Kawngpui humhalh a ngai

PWD, Aizawl Road South Division hotute chuan Inrinni khan Aizawl hnaivaia an hna-thawh leh harsatna an tawhte thuthar thehdarhtute an enpui a, kawng tichhe tam ber chu kawngpui kama leivung paih a ni.

Sorkarin sum tam tak sengin mipuite tan kawngpui a siam a, hemi tichhe thei tura leivung paih duh an awm hi a vanduaithlak takzet a ni. Kawngpui kama leivung hnutchhiahte hi furah kawngpuiah a luang kawi a, chu chuan kawng a tihchhiat bakah lirthei leh ke-a kalte tan harsatna a thlen fo ṭhin.

Aizawl khawpui chhung leh khawpui daiah hian leivung paihna ṭhin a awm a, chutihlaiin a ruka an paihna hmun pawh a awm bawk. Heng hmuna leivung paihtute hian anmahni remchanna zawngin vantlang tana hnawksaka awm hi an pawisa lo hle tih a lang a, hetiang mite hi man chhuaha dan anga hrem an ṭha hle a ni.

Thil buaithlak tak chu heng hmunte hi hmun fianrial leh biru deuhte an ni hlawm a, hei vang hian leivung paihtute hian mi awm loh hlan chângin an paih mai ṭhin a, man chhuah an harsa hle. Duhthusamah chuan heng hmun chhehvela village council/ local council lamin emaw veng thei se, sum tam tak senga kawngpui siam tichhe duhtute hi man chhuah an ṭha khawp mai.

Hemi piah lam-ah hian PWD pawhin ruahmanna siamin leivung an paih rukna hmun bikte hi chu vil dan kawng ngaihtuah se a ṭha khawp mai a, an hnathawh hah sa tichhetute man chhuah tum hian ṭan lo la ve se a sawt ngeiin a rinawm.

Kawngpuia in sakna bungraw chhawp, in sakna tura iron rod chhut ngilte leh cement chawhte thleng hian kawngpui tichhe theitu vek an ni a, eirawngbawlna gas sem pawh hian hun chhan neih a ṭha hle. Kawngpui humhalh kawngah hian mipui nawlpui kan ṭhanharh a hun tawh a, thuneitu lam pawhin
ṭan la zual sauh bawk rawh se.