Myanmar leh Mizoram

Chief Minister Lal Thanhawla chuan tun hnai khan Myanmar a tlawh a, Mizo hnahthlak awmna khaw hrang hrangte tlawhin Chapchar Kut a hmanpui a; Myanmar-a Mizo awmte'n Mizoram chief minister-in a tlawh chu thlamuanthlak an tih thu an sawi.

Mizote hi khawvel ram hrang pathumah a hlawmin an cheng a, India, Myanmar leh Bangladesh-ahte ṭhen hran an ni. British-in heng ram pathumte a awp hnuah ramri a siam a, Mizote chu ram bung khat chhungah dah loin a ṭhen hrang ta a, India ram chhungah pawh Mizoram, Manipur, Tripura leh Assam-ah Mizo ṭhahnem tak a hlawmin an awm.

Myanmar-a Mizo zingah hian an ram dinhmunin a zir loh avangin thil sual tih hreh lo mi ṭhenkhat an awm a, heng mite hian Myanmar ram chhung bakah Mizoramah pawi an khawi nasa hle. Ruihhlo tawlh, silai leh sorkar khap thil dang tawlh ruk, rukruk leh tualthah thlengin Myanmar-a Mizote hming hi hmuh tur a awm ṭhin.

Hengte leh chhan dang avangin Mizorama mi ṭhenkhat hian Myanmar lam mite hi an en dan a fuh tawk lo ṭhin a, misual ṭhenkhatte avangin Myammar Mizo mi ṭha tak takte pawh an hmuh mawh chang a awm.

Tun hnaiah inbiak pawhna a ṭha tawh a, internet hmangin khawvel thlun zawm a ni tawh a, ṭhangthar Mizote hi ram hrang hrangah awm tawh mah ila unau vek kan nihzia leh inpumkhat ṭul tihna a lian thar hle. Mizo ziak mi, zai thiamte leh mi pawimawhte'n tun hnaiah Myanmar an tlawh nasa a, insuih-khawm duhna rilru pawh a lian sawt hle.

Myanmar politics dinhmun a ṭha chho hret hret a, hengte avang hian inkal pawh pawh a awlsam tawlh tawlh ang a, insumdawn tawnna pawh tun aia lian zawka kalpui a nih hmel a; Myanmar leh Mizoram hian inzawmna a nei lian deuh deuh dawn. A chhunga cheng Mizote pawh inpawh tawnin unau kan nihna hi lantir zel ila, misual
ṭhenkhatte thil tih avangin unau kan nihna hi tihchhiat phal lo ila, boruak ṭha chho mek hi vawn nun i tum ang u.