Fake account leh thu dik lo thehdarh

Mizote'n social media kan khawih nasa ta hle a, chuta kan hriat lâr tak pakhat chu 'fake account' a ni. Mi ṭhenkhat chuan second account ti pawhin an sawi. Fake account chu mahni hming ni miah lo leh mahni nihna thup tlata account siam hi a ni mai àwm e. Mizo zingah pawh fake account siam eng emaw zat an awm niin a lang a, ṭhenkhat chuan an nihna dik tak anga an sawi ngam loh te, mi tana huatthlala tur thilte sawina atan leh, thu dik lo thehdarhna atante an hmang ṭhin.

Mizo zingah chuan political party worker ho hian fake account hmanga thu thehdarh an chíng zual niin a lang. Fake account siama neih hrim hrim hi dan bawhchhiatna a ni loin a rinawm a, mi pawi sawina atan, thu dik lo thehdarhna atante hman a nih loh chuan a pawina pawh a awm kher lo ang. Mahse, miin fake account neih duhna rilru a put tawh chuan a nihna tak thupa thil eng emaw, mi huat tur thil leh thu dik tawk lo thehdarh duhna rilru a pu tawh a nih a rinawm; chutiang rilru pu lo tan fake account siam leh neih ngawt a ṭulna a awm reng reng lo.

Tun hnaiah fake account hmanga ram hruaitu pakhat chungchang, dik lo tak nia hriat hmanga beia thu thehdarhtu man a ni a; a thu thehdarh kha a tuartu tan chuan mualphothlak tak a nih bakah, mi tam takin an hmuh dik loh phah theihna a ni. A thu thehdarh kha a dik lo ngei a ni tih finfiah a nih chuan dan angin na taka hrem ni se, fake account hmanga thu dik loa mi chungchang thehdarh pawizia mipuiin an hriat a, an fimkhur phahna atan pawh a ṭha hle ang.

Fake account hi dâwt leh thu dik lo tluantling lo hmanga thu thehdarh a, mi beih theihna 'permit' a ni lo tih kan hriat a ṭha. Fake account a ni emaw, ni lo emaw, thu dik lo thehdarh leh dâwta mi chungchang thehdarh hrim hrim hi thil pawi tak a ni tih kan hriat reng a ngai.

Social media-ah Mizo mipui kan fimkhur a ṭha a, mi thu thehdarh tawh, a dik leh dik loh pawh ngaihtuah loa thehdarh chhâwn zung zung chìn lohte pawh a ṭha. Sorkar lama social media kaihhnawiha thuneitute pawhin thu dik lo thehdarhte hi vil ngun lehzual se, a ṭul anga an bawhzui zung zung a ṭul àwm e.