Lengpui Airport Ramah Mimal Ram

Mizoram Chief Minister chuan March 4, 2024 khan Assembly House-ah Lengpui Airport ram chhungah mimal eng emaw zatin ram an nei a, mi thil titheite'n LSC an neih thluah tawh thu a sawi a; chuvang chuan Lengpui Airport ram chu enfiah (survey) a, airport ram chin chu hung tum a nih thu leh dik lo taka ram inpekin lú a tihhai thu a sawi bawk.

Lengpui Airport hi Mizoram thil neih hlu tak a ni a, India ram pum tan pawha airport pawimawh tak la ni thei a nih avangin tihhmasawna tihchangtlun zel leh zauh zel la ngai tur a ni. Chutih laia a ram chin, a huam chhungah mimal ram a lo awm nual mai hi a zia lo hle mai a; sorkara thil tithei deuh tute'n emaw an inpek a nih ngei a rinawm.

Airport ram chhunga mimal LSC awmte chu dan loa inpek emaw, a rûk a rála inpek emaw a nih ngei a rinawm avangin Mizoram sorkar hian mimal LSC-te chu dan ang takin tihtawp/ṭhiah dan ngaihtuah se. Chutianga sorkarin hma a la a nih chuan, LSC neitute lam aṭangin dodalna a awm ngeiin a rinawm a, law court thlenga kal duhte pawh an awmin a rinawm. Chuti chung chuan, sorkar hi huaisen takin kal se tih hi Mizoram mipui tam ber duh dan a nih ngei a rinawm.

Mizoramah, a bik takin Aizawl leh a chhehvelah hian khawi khawiah emaw chuan ram inpek dan leh miin ram (pass/LSC) an neih dan a mumal lo hle a, LSC inthuah a tam hlea sawi a ni. Ram buai neuh neuh pawh a tam hlea sawi a ni bawk. Hengte hi hun kal tawha sorkar hotute'n dik tak leh felfai taka thil an tih loh vang leh, dan loa thil an tih ṭhin vang a nih a rinawm.

Tun hnuah chuan ram inpek danah sorkar hi dik tak leh felfai takin kal tawh se, ram buaite leh dan loa ram neih chungchangah pawh dan angin huaisen takin kal ngam se; chu chu kan ram damna tur pakhat a ni ang.