Transfer & Posting Rules leh zirtirtu sem rual

School Education Minister chuan an department-in Transfer & Posting Rules an siam ṭha dawn a, Mizoram hmun hrang hrangte chu hlawm paliah ṭhen a nih dawn thu leh, Rules chu siam ringawt loin a taka hman a nih dawn thu a sawi. Sorkar sikul ṭhenkhatah zirtirtu 12-te an awm laiin, sikul 66-ah zirtirtu pakhat chauh an awm thu sawiin, chu chu kum khat chhungin siam rem an tum thu a sawi bawk.

Tun hma aṭang tawhin sorkar sikul hrang hranga zirtirtu awm zat inkhairual lo lutuk hi sawi a ni tawh ṭhin. Sorkar sikula zirlai tlem zawkna khawpuiah zirtirtu an tam a, an indaih loh em em laiin, zirlai nei tam zawk thingtlanga sikul, a bikin khawpui hlat, hmun kilkhâwr deuhahte zirtirtu an indaih lohziate sawi a ni ṭhin. Mi tam takin sem rual an duh thu te, chu chu zirna siam ṭhatna atana thil pawimawh a nih thute an lo puang chhuak tawh ṭhin bawk. Mahse, tun thlengin sorkar sikul zirtirtute hi sem rual a la ni tak tak chuang lo.

Tuna Mizorama sorkarna fawng vuantu ZPM party hi 'Kalphung thar, mipui sorkar' siam tuma inzuar an ni a, mipui pawhin an beisei sang a, thil dik leh ṭhaah chuan huaisen taka kal turin mipui pawhin an beisei. An kalphung thar hian zirna siam ṭha tura zirtirtu sem rual pawh a huamin a rinawm. Zirna siam ṭhat hi ram tan, Mizoram hma lam hun atan a pawimawh si a, huaisen taka zirtirtu an sem rual ngei mipuiin an beisei ngei ang.

Zirtirtute hi a remchan angin sawn kual ve fo hi Mizoram zirna atan a ṭha zawk thei. Hmun laili leh nuam zawka awmte leh hmun kilkhâwr zawka awmte hi an awmna hmun ngaia awm ngawt ngawt loin, awm hun kum bithliah neia sawn kual ṭhin a ṭha a, zirlaite tan mai bakah, zirtirtute tan ngei pawh thil ṭha a nih a rinawm.

Mizoram mipuiin kalphung thar, mipui sorkar hi zirna siam ṭhat chungchangah pawh beiseina sang tak nen an thlir mek a ni.