Zirna hmun thlan fimkhur

Mizoram Nursing Council (MNC) chuan press release siamin, Nursing course-a B.Sc. leh M.Sc. te chu regular class kal lo a, râl (distance) aṭanga zir lo turin Mizo ṭhalaite an chah a; regular class kal loa zir chu phal loh a nih thu an tarlang.

MNC tarlan danin, Nursing course B.Sc. leh M.Sc. kal phung, inkaihhruaina leh zirlai (regulation, syllabus)-te chu Indian Nursing Council duan a ni a, India rama nursing zirnain an zawm vek tur a ni. Regular class–theory leh practical tel loa nursing zirna dan kalh a ni a, INC leh MNC ten an pawm lo.

MNC thuchhuak hi Mizo ṭhalai, nursing zir mek leh zir tumte tan a pawimawh hle mai a, a hnu lama harsatna tawh lohna tura hriat mâkmawh a ni. MNC-in press release hial siama fimkhur tura ṭhalaite an chah aṭang hian India ramah ràl aṭanga nursing zirna leh zir mek an awm a nih ngei a rinawm. General line leh professional course lamah pawh India ramah hian zirna-in rintlak loh tam tak a awm nia sawi a ni ṭhin. Fimkhur a ngai hle mai.

Nursing a ni emaw, course dang emaw pawh ni se, zirna hmun turah fimkhur hle a ngai a; institution chu zirna-in ṭha leh rintlak, sorkarin a pawmpui a ni em tihte chian hmasak a ṭha. Nursing phei chu a tak taka tih (practical) ngai chi a ni tih hria ila, a taka tia zir lo tan thiam mai chi a ni lo a, rin ngam pawh an ni lo ang.

MNC-in fimkhur tura Mizo ṭhalaite an chah hi mi tinin an ngaih pawimawh a, fimkhur tak tak nan an hman a ṭul a; zirlai leh ṭhalaite mai bakah, nu leh pate pawhin an fate an fimkhurpui a ngai a ni.