Doctor chungchanga sorkar harsatna

Mizoram Health and Family Welfare Minister chuan Mizo doctor-te zingah thingtlanga awm hreh vangin sorkar hnathawk nghet an nih dawn loh chuan Mizoram sorkarah scheme hnuaia thawk duh an awm lo a, chuvang chuan sorkar damdawi-inah doctor indaih lohna a nasat thu a sawi. Zoram Medical College-a MBBS batch hmasa berte an chhuah hunah Mizoram sorkarah kum hnih tal an thawh a ngaih avangin doctor indaih lohna zualpui a ziaawm theih beisei a nih thu a sawi bawk.

Mizo doctor-te zinga tam tak chu thingtlang leh hmun kilkhâwr zawkah an awm duh lo tih hi tun hma aṭangin sawi a ni ṭhin a, doctor chungchanga state sorkar harsatna ber pakhat a ni. Kum 10 chuang kal ta aṭang khan HFW department chuan National Health Mission (NHM) hnuaia thawk tur a zawng ṭhin a, Mizo doctor zinga thawk duh awm ve zauh zauh mah se, a tam ber chuan an duh lo. Tunah pawh hian sorkar chuan NHM hnuaia thawk duh an awm phawt chuan a la nghal thei reng nia sawi a ni. Mahse, doctor tam tak chuan NHM hnuaia thawh ai chuan mimal damdawi-ina thawh an duh zawk ṭhin.

Doctor-te'n thingtlanga an thawh duh loh hi an thu a ni a, sorkar chuan tih luih theihna a nei lo niin a lang. Chuti chung chuan, doctor tam ber hi chu Mizoram state quota kaltlanga doctor zir an nih a rinawm. Doctor an zir theihna chhan pakhat Mizoram sorkar tana a nghet loa doctor han thawh rih phawtte hi an duhthusam ni rih lo mah se, hreh lutuk lo se, Mizoram leh hnam tan thil lawmawm leh ṭha tak a ni ang.

Doctor hna thawh hi eizawnna a nih rualin, ram mipui rawngbawlna a ni a, hetiang rilru hi Mizo doctor zawng zawngte hian pu thei se; anmahni mamawh tak taktu thingtlang mipui tana malsawmna ni turin rilrute pawh pu thei se an va hlu lehzual dawn em. Sorkara a ngheta thawk tur lâknaah pawh duhsak bik an nih pawhin a àwm viau thei àwm e.

Mizoram sorkar pawh doctor lâk danah mumal zawka a kal a ngai a; chutiang bawkin staff nurse lâk danah pawh tih dan mumal zawk a neih a ṭul. Sorkar hian kum tin MCS, MPS leh service dang ṭhenkhat a la ṭhin ang hian, doctor leh staff nurse hi kum tin tam lutuk lo pawhin la ṭhin se, healthcare lama thawktu indaih lohna nasa lutuk a ziaawm theih a rinawm a, transfer & posting pawh a mumal zawk thei ngei ang. Hetianga kal tur hian thil harsa lutuk a nih a rinawm loh a, sorkarin a tum phawt chuan thil theih a nih ngei a rinawm.