Health Care Scheme bill pek chhuah

Mizoram State Health Care Scheme hnuaia damlo bill táng neite hnenah an inenkawlna senso pek a nih theih nan Mizoram Health Secretary chuan March 8, 2024 khan cheng vbc. 39.26 cheque hmangin a pe chhuak a, vawiin hian damlote bank account-ah sum thun beisei a ni.

Sorkar thuchhuahin a tarlan danin, cheng vbc. 39.26 hian mi 11,046-te bill a daih dawn a, kumin January thlenga bill lut tawhte a huam dawn. Kumin February leh March thlaa bill lutte erawh a la daih dawn rih lo thung.

Mizoram sorkarin sorkar hnathawk awm lohna chhungkuate tana Health Care Scheme a siam hi a lawmawm a, bul ṭantu MNF kaihhruai sorkar hmalakna niin, mipui tan a hlu hle. A tìr lamah thil kal fuh lo a awm a, damlote'n bill an dawng mai thei lo a, a hnuah tluang takin a kal zui a ni.

Sorkar term liam taah khan bill táng a tam hle a, sorkarin damlote inenkawlna a pek theih loh kha cheng vbc. 60-te a chuang hman a, damlote pawh an mangang hle. Health Care Scheme-a inziak lut pawh nasa takin a tlahniam a, a kal tluan laia mi nuai khat vel an inziah luh ṭhin laiin, sorkar term hmasa hun tawp lamah phei chuan mi 30,000 chuang êrh âwrh chauh an inziak lut duh tawh. Hei hi sorkarin inenkawlna senso a pek hleih theih loh vang niin a lang.

Dam loh vanga inenkawl mi tam takin an inenkawlna senso sorkar aṭanga an hmu thei dawn ta hi a lawmawm tak zet a, mi tam tak manganna a reh thei dawn ta niin a lang. Bill táng pek chhuah a nih theihna tura hma latute an fakawm hle.

Hun lo kal zel turah pawh Health Care Scheme hi kalpui chhunzawm zel tur a nih hmel a; mipui tana tih a nih angin damlote'n an inenkawlna senso an hmuh thuai theih nan sorkar pawhin ṭan la zui zel se a lawmawm hle ang.