MPF leh Baptist Kohhran

Baptist Church of Mizoram (BCM) Assembly vawi 128-na, Lunglei Electric Veng biak-ina March 7-10, 2024 chhunga neih chuan Mizoram People Forum (MPF)-a tel a thuphungin an pawm a; mahse, zir chian a, la ngaihtuah ṭhat leh atan an dah. BCM website-ah chuan, "Sawihona hun pawh rei tâwk tak hawn a ni a, Assembly palaite pawhin MPF-a tel ve ṭha an ti hle a, uluk leh ngun zawka ngaihtuah ṭhat leh ni se tiin rêl a ni," tia tarlan a ni.

MPF hi kum 20 dáwn kal ta khan din a ni a, a bul tumtu chu Mizoram Presbyterian Kohhran niin, president mawhphurhna pawh a tir aṭanga tun thlengin Synod moderator apiangin an chelh ṭhin. MPF-ah hian kohhran pawl ṭhenkhatte leh tlawmngai pawl hrang hrang an an tel. Mizorama kohhran lian ber dawttu BCM erawh an la tel lo thung a, kumina BCM Assembly-in MPF-a tel a thuphunga an pawm ta hi a lawmawm hle.

Baptist Kohhran hi MPF-ah an tel a nih chuan MPF tichaktu pawimawh tak an nih ngei a rinawm a, MPF hmalakna pui ber–inthlanna thianghlim, felfai, zalen leh rálmuang Mizorama a awm theihna turah pawh chak zawka an kal theih ngei a rinawm. Chuvangin, an zir chian hnua an ngaihtuah leh hunah pawh MPF-a tel ngei turin rilru nei thei se a duhawm hle.

MPF hi thil ṭha tih tum an ni a, hma an lak tawhnaah erawh anmahni leh Mizoram mipui duhthusam ang tak erawh an thleng pha kher lo ang. Inthlanna thianghlim leh ralmuang Mizorama a awm theihna kawngah erawh MPF hmalaknain awmzia a nei hle tih a hriat a; BCM an tel leh phei chuan MPF hmalaknain a huam zau lehzual dawn a, MPF thil tum leh hmalaknain rah ṭha lehzual a chhuah ngei a beiseiawm a ni.