Hnathawk loa sum hmuh

Rural Development minister R Lalzirliana chuan, "Kutdawh rilru pua thawk loa sum hmuh tum chu sorkarin a ngaithei lo. Thawhrimna tel loin hlawhtlinna tak tak a awm thei lo," a ti.

Mizoramah hian hnathawk mang loa sum hmuh tumna hi a lian ta hle niin a lang a, a vanduaithlak khawp mai. Chief minister ber pawhin hei hi a thusawinaah vawi tam tak a sawi lang tawh a, tunah sorkara mi challang ber pakhatin a sawi leh ta.

Hnathawk mang loa sum hmuh tum zingah hian a langsar ber pawl chu political party worker-te hi an ni a, rorel lai apiangin hei hi an ching niin a ngaih theih. Political party tana thawhrim avanga sorkarna chan hnua contractor anga inngai leh supplier ni ta nghal ang maia khawsa hi tam tak an awm. Ruling party mi leh sa han induhsak deuhte hi chu a hriatthiam theih a, nimahsela mahni contract hmuh hralh chhawng chi te, hnathawh chhe lutukte leh duhsak tlak lo khawpa hnathawk an awm ṭhin hi a pawi a, heng mite hi hnathawk mang loa hlawkna hmuh tumte chu an ni chiang mai.

Sorkar hnathawkah hian mi tam tak chutiang mi chu an awm bawk a, hlawh hmuhna turin sorkar office-ah an thawk a, ṭan hun leh ban hun a awm a, a ṭul bika hman theih turin leave lak phalsak an ni. Heti chung hian Mizorama sorkar hnathawk zinga tam tak hi chuan thlen hun aia tlaia thleng a, a hun hmaa office chhuahsan a, chhiatni-
ṭhatnia chawlh la loa office chhuahsan reng sia hlawh la an awm a, hengte pawh hi thawh loh hlawh la anga puh theih an ni mai lo maw?

MGNREGS hnuaiah pawh hian hnathawk mang loa hlawh lak dan kan thiam thar zel a, that-chhiat inzir ṭanna angah kan hmang mai ang tih pawh hlauh-awm tak a ni. Thiltithei deuhin compensation hmuh theihna tur thlir ranin ram an lo lei bawk a, hei pawh hi hnathawk loa hlawkna ûmna chi khat tho a ni.

Engpawhnise hnathawk si loa hlawkna kan tum hian kan ram leh hnam a eichhe mek a, heng thilte titawpa siam ṭha theitu langsar ber chu sorkara vawnfing chelhtute hi an ni a; hnathawk mang loa hlawkna awm theite titawp tur hian sorkar hian a takin ṭan a la ngam dawn em?