Khaw khat tan thlai chi khat

Khawlailung Sugarcane Growers’ Association (KSGA) chuan tun hnaiah Kurtai Kût an hmang. In 130 chuangin fu an chîng a, kum 2015 khan kurtai quintal 2,500 vel tharin, Rs. 1,25,00,000 hû vel an hralh a, kuminah kurtai tam zawk thar an inbeisei.

Khawlailung khuaa in 500 zinga in 130 velin fu an ching a, chuti chung pawh chuan Kurtai Kut hmang thei tur khawpin an thar ṭha a, an lawmpuiawm hle a ni. A khaw pumin fu ching ta se, Mizoram pum mamawh kurtai hi an siam chhuak thei hial mai thei a, a chingtu an tam na na na chuan kurtai sawngbawl dan awlsam zawk,
ṭha zawk, chak zawk leh man tlawm zawk pawh an ngaihtuah chhuak thei ngei ang a, a hlawm liana thil kalpui hi a hlawk hle a ni.

Mizoramah hian khaw tinah kuthnathawktu kan awm vek a, thlai chi hrang hrang kan buaipui a, a hlawk tawk lo tih a takin kan hmu mek. Khaw ṭhenkhat fing deuhte chuan thlai leh thei chin uar bikte an nei a, a hralh theih hnuah a hlawma hralh a awlsam a, sum siamna atan pawh a ṭangkai hle a ni.

Tuna kan kal danah hi chuan mahni chhungkaw ei khawp te te kan loah kan ching a, din chhuahpui tham ni si loin nghei lohna tawk kan thar a, hei hi kan kalsan thei si lo. Sorkar lamin thlai leh thei chin uar tur an tihte hi kan la ring zo lo a nih loh pawhin eizawnna ṭha tak a la tling lo a ni mai thei, tun thlengin Mizo loneitu tam zawk chuan pi leh pute hunlaia tlangram lo neih dan kha kan la kal pêl thei meuh lo chu a ni e.

Engpawhnise ruahmanna ṭha tak nen, mahni khua leh a chhehvela thlai leh thei ṭha duh bik mithiamte rawnin thlang thiam ila, a hlawma thil kan chin na na na chuan a hlawkna pawh a awm thei deuhin a rinawm. Tuna tih nghal theih a nih loh pawhin, mi thiamte'n a area bikte thlangin zir chiang se, thil te tham buaipui kalsan hian a lian thama a hlawma thlai leh thei chin hi a hun tawh hle a ni.