Ruihhlo ngaite enkawlna hmun

Ruihhlo ngaite enkawlna Jordan Centre, Seṭhàwn chu Social Welfare & Tribal Affairs, Women & Child Development Minister-in March 9, 2024-ah a tlawh a, a tlawh lai hian ruihhlo ngai mi 27 (mipa 22 leh hmeichhia panga) enkawl mek an ni a, thawktu Centre Director nen mi 40 an awm tih tarlan a ni.

Jordan Centre hi Mizoram sorkarin a din a ni a, sorkar sum cheng vaibelchhe tél hman a ni tawh. Ruihhlo ngai enkawl mek mi 27 chiah an awm a, thawktu mi 40-in anmahni aia mi 13-a tlem zawk an enkawl tihna a ni a, an enkawl hneh viau mai thei.

Ruihhlo ngaite enkawlna tho, mimal leh pawlin an dinahte chuan enkawl lai (inmate) an tam em em a, an tâwt em em a, an inêkbeng tak meuh hlawm. Thawktu tlem têin an enkawl a, sum hmuhna nghet an nei lo tlangpui bawk.

Mimal leh pawl din home/centre hrang hrangah an tâwt em em reng laiin, sorkar din Jordan Centre-ah an tháwl em em thung hi ngaihtuah chian ngai tak a ni. Jordan Centre-ah hian lût duh, chhungte leh ṭhiante luhtir duh an tam lo a ni thei a, chuti ni se, miin an ring ngam tawk lo tihna a ni thei. Centre nihphung hi sorkara mawhphurtute'n ngun taka an zir chian a, a kal zel dan tur uluk taka an ngaihtuah a ngai.

Chutih rualin, kalphung mumal tak a awm avangin enkawl mek zat an tlem pawh a ni thei. Awm hun chhung tura ruat angah ṭha takin an inenkawl a, enkawlate'n an ṭhatpui a, hun rei tak awm chawt ngai loin ṭha takin an chhuah theih ṭhin avangin enkawl mek an tlem a ni thei bawk. Heng thilah hian thil awm dan leh an dinhmun chu mawhphurtute'n an hre chiang ngei ang.