SEDP zirtirtu leh zirtirtu lâk dan

Mizoram sorkar tharah sorkar term hmasa an lo kalpui thil eng eng emaw tihdanglam leh tihtawp a awm zauh zauh a, ṭhenkhat chu thil tih àwm ngawih ngawih a nih laiin, ngaihtuahna zau zawk sên a ngaihna chite pawh a awm thei ang.

Sorkar term hmasaah SEDP hnuaiah zirtirtu tam tham tak lâk a ni a, department dangahte pawh thawktu lak eng emaw zat a awm. SEDP hnuaia lakte hi sorkar sum aṭanga hlawh la ve an nih miau avangin sorkar hnathawk tih ve mai theih an ni a, zirtirtu indaih lohna phuhrûkna kawngah pawh an ṭangkai viauin a hriat.

SEDP hnuaia zirtirtute hi sorkar sum ringa lakte an nih rualin, party thil taka lak an ni. A tam ber chu political party hotute–hmunpui lam, block leh unit hruaitute'n an mi duhsak zawngte an lâk niin a lang a; sorkar hnathawk tur lakna kaihhnawih danin awmzia a nei lo a, sorkar hotu (official)-te pawh an inrawlh lo niin a lang.

Sorkar sum vaibelchhe têl sên belhna turah party induhsakna langsar taka thil tih hi a mawi lo a, a ṭha lo bawk a. Tunah a latu sorkar an tla a, lâk an nihna scheme (SEDP) a tàwp zui bawk si a, an tawp mai a ngai ta niin a lang. An khawngaihthlak letling khawp mai.

Tuna School Education Minister chuan, SEDP hnuaia zirtirtute chawlhtir an nih huna zirtirtu indaih lohna vanga harsatna sukiang turin ruahmanna siam mek a nih thu a sawi. Zirtirtute hi zirlaite hma lam hun hriltu, an nun kaihruaitu an nih avangin an pawimawh em em. Zirtirtu lâk dan pawh dik taka kalpui a ṭul a; party, chhungkhat laina leh hmelhriat ṭhate induhsak bikna awm loin, thiamna leh theihna hmanga a tling apiang lak ni se; hei hi kan ram zirna siamṭhatna tura pawimawh tak pawh a ni.