ILP felfai nei lo hnam dangte

Mizoram Police leh CYMA ruahman angin police-te leh hmun hrang hranga YMA-te'n March 12, 2024 zan khan Mizorama khaw eng emaw zatah hnam dangte enfiah. Hnam dangte chu Inner Line Permit an neih leh neih loh leh, an ILP-te a dik leh dik lohte enfiah a ni a, ILP fel lo mi 1,187 man an ni.

Mizoramah hnam dang tam tak an awm a, tun hma aṭang tawhin dan ang taka awm an nih leh nih loh endik an lo ni tawh ṭhin a; police, YMA leh zirlai pawlte'n an endik tlangpui. Hnam dang enfiah a nih apiangin ILP nei lo leh ILP nei pawh felfai lo mi eng emaw zat man tur an awm ziah a ni.

Mizo ṭhalaite zingah taima tak tak, hna thawh hreh bik nei lo tam tak an awm karah hnam dangte hi Mizoram leh Mizote'n kan mamawh an ni a; a bikin in sak lam hna leh 'labour hna' ang chite thawk turin kan mamawh. Hnam dang tel lo hian Mizo hlang chauha awm thei kan ni bik lo a, inmamawh tawn kan nihna chin a awm. Mizo hnam bil anga inhung phui hmak theih a ni lo a, India rama kan awm chhung chuan Mizoramah hian hnam dang tam tak an awm reng dawn a, an la tam tial tial a ni thei.

Tribal ni lote Mizorama an awm dawn chuan ILP an neih a ngai a, dan ang taka an awm theih nan sorkarin ṭan a lak lehzual a ngai a, a ṭul apianga tlawmngaite pawh an la chêt chhuah zel a ngai ang.

Hnam dang endik apianga ILP felfai lo hmuh chhuah tur tam tak an awm ziah hi ngaihtuah chian a ngai a, dan ang taka an awm vek theih nan ṭan lak a ṭul. ILP neih dan kalphung ennawn leh ILP pek chhuah dante hi khauh zawka kalpui a ṭul a ni mai thei a, thuneitute'n ngaihven lehzual se a ṭha hle. Hnam dang la luttu Mizote pawhin mawhphurhna lian tak kan nei a, kan fimkhur zual zel a ṭul bawk.