Assembly House rorel inkhawm

Mizoram State Legislative Assembly pakuana session vawi hnihna, budget session ni bawk chu legislator-te ni 16 an ṭhutkhawm hnuah March 13, 2024 khan tihtawp a ni. Session tluang taka neih a ni hi a lawmawm a, Governor bakah, Vice President Jagdeep Dhankhar-a'n thu an sawite kha a lawmawm a, hmuh hrehawm khawpa inauh buaina a awm lote kha a lawmawm takzet.

Parliament rorelnaah MP-te an inauh buai nasat ṭhinzia te, kut inthlak an awm ṭhin dan te, suspend ngai khawpa che mawi lo an awm ṭhin thu kan hre ṭhin. State dang assembly-ah pawh mawi lo taka chêtna a thlen ṭhin thute kan hre fo. Mizoram Assembly session-ah pawh hun hmasa lamah chuan rorelna tibuai khawpa inauh buaina leh kut inthlâknate pawh a lo thleng ve tawh ṭhin.

Kum eng emaw ti kal ta aṭang khan Mizoram Assembly House-ah rorel kal lai tibuai khawpa inhnial buaina leh, harsatna lian tham thleng a awm ta meuh lo a, a lawmawm. Kan MLA-te an felfaizia leh an hawihhâwmzia tilangtu a ni.

Kan ram roreltute hi Mizoram hmun hrang hrang aṭanga kalkhawm, political party hran hrana mi, policy pawh inang lote an ni a, inhnial buai chángte chu awm lo thei a ni lo. Mihring famkim kan awm lo a, sorkar lai mi leh sate tan pawh tih dik famkim a harsa ang; an tih dik loh te, chêt fuh lohnate sawi chhuak a, sorkar khalh ngil tura chêt a ngaih châng a awm, chu chu ram tana thil ṭha zawk thlenna tur a ni fo bawk.

Mizoram rorelna in sang bera buaina a chhuak ve ngai ta meuh lo hi a lawmawm a, state dangte tan entawn tlak a nih pawh a rinawm. Chutih rualin, inhnial buai loh lutuk pawh a ṭha ber lo mai thei. Ngaihtuahna sên tâwk loh vang te, ngaihsam vang te, taimak tâwk loh vangte emawa Assembly House-a inhnial buai lo an nih chuan, ram leh hnam tan a ṭha ber chuang lo.