Khawpuiah police ṭang thar leh thei se

Tun hnaiah Mizoramah Covid-19 positive hmuh chhuah thar an tlem sawt hle a, Mizo zinga inkai chhawng phei chu an awm tawh meuh lo a tih theih a, Covid-19 positive hi mi 300 pawh an tling tawh lo. 

Hetihlai hian khawpuiah nunphung pangngai a inṭan chho leh mek a, mipui pawn chhuak an pung a, sumdawnna hmun te pawh an hawng chho ṭan mek a, public transport pawh a lûn leh tawhin Aizawl khaw­puiah chuan traffic pawh a jam nasa leh ṭan ta hle. Hetihlai hian mipui zingah khawlaia mask vuah lo leh social distancing ngai pawimawh lo an pung zel niin a ngaih theih. 

Mask vuah loh leh social distancing ngaih pawimawh loh chungchangah hian mipui hi tawngpawng dem theih pawh an ni lo; hmun hrang hrang aṭanga mi inang lo tak tak chhuak khawm an nih miau avangin dan zawm lam harsat tawk hi chu an awm lo thei lo. A vengtu police lam an awm loh chuan mipui chu an inthlahdah leh thuai ṭhin a, hei vang tak hian vengtu leh kaihhruaitu police kan mamawh a, mipui hi kaihhruai an ngai a ni. 

Tlemlai deuh khan Aizawl khawpuiah police-te an thawk ṭhain an thawkrim em em a, veng kilkhawr deuh thlengin mask vuah tura mipui zirtirin mask vuah lote an man a, pawisa an chawitir zel. Khatih hunlai kha vantlanga Covid-19 hri inkai darh an la awm mang lohlai a ni nghe nghe. Tunah pawh vantlanga he hri inkai darh hi nasa takin a tlahniam tawh a, police lamin ṭan han la thar leh se, state pawn aṭanga lo lutte kan khuahkhirh ṭhat theih bawk chuan Covid-19 hi Mizo mipui ṭang rual hian Pathian zarah kan hneh thei mai dawn ni pawhin a lang chho mek a ni. 

Tun hnai hun pawimawhah hian kan police-te'n ṭan la thar leh se, mask vuah tura mipui zirtir chungin thu zawm lote hrem leh se, social distancing ngai pawimawh thar turin hrilh bawk se. Covid-19 hri darh tur venna kawnga thawk ṭha tak kan police-te'n ṭan han la thar leh teh se.