Kan hmaah Lok Sabha Inthlanpui

Election Commission of India (ECI) chuan India ram puma Lok Sabha inthlanpui neih hun tur Mach 16, 2024 tlai khan an puang ta a, Model Code of Conduct (MCC) pawh ram pumah hman nghal a ni.

Lok Sabha General Election 2024-ah hian India ram pumah voter vbc. 96.8 an awm a, mipa vbc. 49.7 leh hmeichhia vbc. 47.1 an ni a; vawi khatna atana vote thlâk thei mi nuai 182 chuang an awm. Voter zingah rualbanlo (persons with disabilities) mi nuai 88.4 an awm a, kum 85 chung lam mi 82 an awm bawk.

Mizoramah chuan Lok Sabha inthlan hi Legislative Assembly inthlan ang em emin mipuiin an ngai thutak lo niin a lang. Kum 2018 leh 2023-a Mizoram Assembly inthlanpuiah khan vote 80% chung lam ve ve a tla a; kum 2019 Lok Sabha inthlanpuiah khan India ram puma vote tla zat 67% chuang hret a nih laiin, Mizoramah chuan 63.13% chauh a ni.

Lok Sabha inthlan hi Assembly inthlan ang em emin kan ngai pawimawh lo deuh a nih pawhin, Mizoram aiawha Parliament-a ṭhu tur thlanna a nih tlat avangin a pawimawh em em reng a, tun aia kan ngaih pawimawh lehzual a ṭha hle. Vote nei zawng zawng chuan vote thlak vek i tum ang u.

Political party te, candidate-te leh party worker zawng zawngte'n MCC an ngaih pawimawh thar a ngai. MCC hi bawhchhiat tura siam ni loin, zawm tura siam a ni a; chuvangin, inthlan vuakvêtah hian MCC anga kal mai hi mi tin mawh a ni.

Inthlan a hnai tial tial ang a, candidate-te leh political party mite pawh an ṭang telh telh dawn. Campaign danah fimkhur a ṭha a, dâwt leh thu dik tluan tling lo hmanga inbeihna leh insawichhiatnate awm lo se. Vantlang inkhawmah a ni emaw, social media-ah a ni emaw, thu dik lo hmanga mi beih leh mi chungchang sawi awm lo nan mi tin kan fimkhur a ngai e.