Mizoram police-te an chhuanawm

Tun hnai lawkah Aizawl khawpuiah tualthihna rapthlak tak a thleng a, Mizoram pum a déng chhuak a, mipui thin a ṭháwng hle. Tualthahna a thleng tih hriat a nih aṭanga hun rei lo te chhungin Mizoram police-te'n tualthattu nia rinhlelh an man nghal a, Home Minister pawhin mipui hriat turin a puang chhuak nghal a ni.

Aizawl New Market-a inthahna thleng chungchangah Mizoram police-te an che chak hle mai a, mi tam tak rin phâk bâk a ni hialin a rinawm. Khati taka police-te an che rang kha an chhuanawm a, fak an phú hle. Chhui zui zel ngai eng eng emaw a la awm zel ang a, chu'ngahte chuan chak taka an bawhzui zel a, report pawh a hun takah an thehluh ngei mipuiin an beisei ngei ang.

Police hmalak dan Home Minister-in a puannaah, hnu chhuina tiṭhuanawp thei tur thil ti lo turin mi tin a ngen a; hei hi a pawimawh hle. Mizoramah hian thil thleng ṭhenkhat, a bikin chhiatna lam thil thlengah thil hre hmasatu leh thehdarh hmasatu nih châk tam tak an awm a, hmanhmawh luatah thu dik lo thehdarh pawh a awm fo. Hetiang hian mipui a tirálkhêl a, mipui rilru a tibuai a, police-te hnu chhuina tibuai thei a ni.

Internet a ṭha ta hle a, tleirawl aṭanga puitling, kum upa tak tak thlengin smartphone hmangin social media kan khawih tláng tawh a, tunah chuan mi tin mai hi thuthar thehdarhtu kan ni tawh a ti theih. Chutih laiin, thuthar thehdarh chungchangah inzirna mumal nei chu mi tlémtê an ni a, a tam ber chu thehdarh àwm chin hre lo leh ngaihtuah lo an ni ang.

A dik leh dik loh finfiah lo leh hre chiang loa social media-a hmuh apiang thehdarh zung zung ni lo turin insûm kan mamawh hle; Mizoram mipui kan fimkhur zual zel a ngai a ni.