AMC kum a liam ta

Aizawl Municipal Corpo­ration (AMC) chuan an term an hmang zo ta a, councillor mi 19-te councillor an nihna a tàwp a, AMC-a rorelna hi Commissioner-in a kengkawh nghal. State Election Commi­ssion (SEC) chuan Covid-19 hri leng avangin inthlan a la puang lo. 

AMC dan ang chuan, AMC councillor term pawhsei theihna dan ziah lan a awm lo a, term a tàwp a, sorkar thar din theih a la nih loh chuan administrator-in a enkawl tur a ni. Tunah hian AMC chu Mizoram sorkar kutah a awm angin sawi theih a ni a, inthlan hma chu ani hian a enkawl chho dawn a ni. Eng tin nge an kal a, eng angin nge hna an thawh a, hna thar pek chhuah a awm nge awm lo tih leh AMC che vel hi mipuiin an vil chhunzawm reng tawh dawn a ni. 

Kum nga chhung hnathawk tura ruatte'n an hun an hmang zo tawh a, Covid-19 hripui chu leng lo se inthlan thar leh tawh tur a ni. Hei vang hian hna laklawh thawh zawh hman loh pawh awm lo turah ngai ila, hna hmanhmawh bik AMC-a councillor thar thlan hmaa lo thawh nghal vut vut ngai pawh  a awm hmel lo a; heti chung hian AMC hian hun khaihlak chhung hian contract hna thar a lo thawk a nih chuan tuten nge thawk a, eng hna nge a nih, eng zat man nge an thawh tihte pawh chhinchhiaha chhui chhuah zel a ṭha ang. 

Kum nga chhungin hna­thawhna hun a awm a, chumi mil tur chuan sum pawh ṭhahnem tak pek chhuah a ni. Sum hman bang a la awm a nih pawhin mipuiin Aizawl khawpui enkawl tura an thlan chhuah tharte kutah dah mai ni se, chumi pawh nghak hman loa hnathawh a lo awm palh a  nih chuan thil fel lo tak a ni ang. 

AMC-in an hun an hmang zo ta a, kum nga chhungin hmasawnna hna ṭhahnem tak kan hmu a, an sum hman ral zat leh an hnathawh a inphu tawk nge tawk lo tih lam chu lo dah ṭha ta ila; tihfel loh leh tihfuh loh nei bawk mah se, an hun chhunga an hnathawh ṭhatte avangin hriatreng an hlawh tawh dawn a ni.