Hmasawnna hna thawh ṭha lo

Tun hnai lawkah Lunglei Luangmual leh Vaisam khaw inkar kawng km. 26 chuang hret, PMGSY hnuaia Rs 45,18,74,346.36 (vbc. 45.18) hmanga siam chu hna thawktute'n an thawk ṭha lo hle a, an hna leh kawng siam a siam chhe hle nia sawi a awm a, social media-ah video a darh nasa hle. Social activist nu pakhat chuan thil dik lo leh sorkar sum tihchingpen a awm nia ngaiin Anti Corruption Bureau-ah FIR a thehlut hial a ni.

Mizorama hmasawnna hna thawh hrang hrangah hna ṭha tâwk lo te, sum ruahman zat leh hnathawh inmil lote sawi leh hmuh tur a awm fo a; hna tam tak chu thawh zawh hun tur bitukah zawh a ni lo. Chuvang chuan sum ruahman, uluk taka chhût chhuah thlap tawh chu tihbelh a ngaih phah ṭhin a; chu chu sum tihchingpen a awm ṭhinna lai pakhat a nih thu sawi a awm ṭhin.

Sorkar hnuaia hmasawnna hna thawktute hian a àwm tâwkin hlêp an nei tur a ni a, chawi belha hna thawh thu a awm lo. Hna atana sum ruahmannaah pawh contractor-te hlép tur zat tlangpuite nen lam chhût sa a ni ṭhin. Mahse, contractor-te'n an hlêp tam theih nan hmanraw ṭha lo an hmang ṭhin a, a nih tur ang takin hna an thawk lo fo niin a lang. Contractor-te hlêp tam tum lutuk hi ram leh mipuiin an tuar ta ṭhin a ni.

Ram leh mipui hmasawnna tak tak thlen tur chuan hmasawnna hna thawhnaah contractor te, hna viltu engineer te, sorkarna chelhtu minister thlengin an rinawm a ngai. Hlemhle taka hna thawk loin, Kristian, Isua ringtu an nihna an tilang ngam ve tur a ni. Chutiang tur chuan mi tinin tih theih chin kan nei mai thei a; hna kaihhnawiha mawhphurhna neite'n mawh an phur lian lehzual tih an hriat chian a, rinawm taka hna an thawh ṭheuh a ngai a ni.