Damdawi-ina nu leh naupang thihna

March 13, 2024-a Aizawla mimal damdawi-in pakhata Ruallung khaw naupang thih danah Ruallung khaw mipui an lungawi thei lo a, March 18 khan khawtlang huapin kawng an zawh; an khaw naupang thih chhana doctor-te'n an sawi chu pawm harsa an tih thu leh enliam mai loa hmalak zel an tum thu an tarlang. Naupang thih dan hi Mizoram mipui tam tak pawhin an rilru a natpui niin a lang.

Lengpui khaw nu pakhat State Referral Hospital-a nau nei tura lut chu March 11, 2024 khan nau chungah a thi hlauh mai bawk a, MHIP Gen.Hqrs chuan nau chunga nu a thi chu ngaihsak a hlawh tâwk loh vang niin an sawi a, pawi an tih thu an tarlang.

Damdawi-in pahniha naupang leh nu thihna thleng hi a pawi a, a tuartu chhungkua tan a na hle ang. An thih danah mi tam tak ngaih a ṭha lo a, an rilru a dam lo a ni. Chutih rualin, damlo enkawlna lama thiamna nei ve lo tan leh anmahni enkawltu tan lo chuan an thih chhan tak hriat theih a ni lo. Inchhan harsa tawh tak dinhmuna awm an nih theih rualin, damdawi-ina thawkte inthlahdah vang leh fimkhur tâwk loh vang a nih chuan a pawi lehzual ang a, thubuai rip tak neihna tham pawh a ni ang.

Tunlai khawvelah thiamna a sang tial tial a, hmanrua a ṭha tulh tulh a; chu'ng karah chuan damdawi-in changtlung pawl zinga mi-ah nau chunga thihna a la thleng hi a zialo tak zet a ni.

Tun hnaia damdawi-in pahniha thihna thleng hi damdawi-ina thawk, damlo enkawlna lama thawk zawng zawngte'n fimkhur phah nan leh an hnaa inpekna thûk zawk an neih phahna ni se a duhawm. Hun harsa leh thim hi insiamṭhatna atana hmang thiam apiang tan hlâwkna a ni ṭhin. Damdawi-ina thawktute an inenfiah a, ṭan an lâk thar a, an fimkhur zual deuh deuh a ṭul ang. Sorkara thuneitute pawhin a ṭul ang zela hma an lâk a ngai bawk.