Faina leh thianghlimna - mi tin mawh

Tun hnaiah Aizawla zirna-in sang pahniha zirlaite'n Tlawng lui leh a fintu lui dunga bawlhhlawh, a bikin sarâng (plastic) lam chite tifaiin an hnatlang a, bawlhhlawh tam tham tak an chhar khawm a ni. Zirna-in dangte pawh lui dung leh khawlai tifaiin an lo hnatlang fo tawh. Faina leh thianghlimna lama zirlaite ṭhahnemngaihna leh tha thawhte a lawmawm.

Mizoram lui tuite hi bawlhhlawh paih dana fimkhur loh vangin a bawlhhlawh tial tial tih an sawi ṭhin a; bawlhhlawh paih duhdah hi luite bakah, veng mawng lama awmte'n an tuar hle ṭhin. Chuvangin, bawlhhlawh paih danah mipui kan fimkhur zual deuh deuh a ṭul. Aizawlah phei chuan veng tinah bawhhlawh paihtu lirthei a tlân a, chhung tin leh mi tinin kan hman ṭangkai ngei a ngai a ni.

Tun hmain Mizote hi faina leh thianghlimna lamah kan hniam a, chu chu tuna kum upa lam deuhah pawh a la lang thei niin a hriat. Chìn ṭhana lo neih tawh hi sim mai a harsa fo a, bawlhhlawh paih chungchangah pawh hma kan sâwn chak loh chhan a ni thei.

Naupang leh ṭhalaite erawh a tlangpui thuin hawiher zau zawk an ni a, faina leh thianghlimna pawh kum upa lamte ai chuan an nunah a bet deuh zawkin a hriat. Ṭhalai zawkteah faina leh thianghlimna hi an nuna a beh tlat theih nan naupan lai leh tleirawl lai aṭanga nasa zawka inzirtir a, ṭan lâk a hlâwk hlein a rinawm.

Mihringte hi thlen chin aṭanga hmasawn tur kan ni a, faina leh thianghlimna lamah pawh hmasawn zel hi kan nih dan tur a ni. Khawlaite, lui dungte leh puipunna hmun dangte a faia a thianghlimna hi mi tin mawh a ni a, mahni hmazâwn ṭheuhah ṭan lâk zual sauh sauh a ngai e.