Mihringa sumdawnna

Mizoram police-a CID (Crime) chuan, kum 2000 aṭanga March 2016 theng khan mihringa sumdawnna (human trafficking) chungchangah thubuai 20 a ziak tawh a, a kaihhnawihah mi 42 an man tawh a; kumin March thla thleng khan human trafficking tuartu mi 32 an awm tawh.

Mihringa sumdawnna hi sawi a awm fo a, a taka tawng lotu tan chuan Mizoram harsatna ni pawhin a hriat loh. Thil hi a hun hmaa invenna lam sawi uar lutukte pawh hi a awm ve thei a, a hre lo turte kan sawi hmuh phah ve theih avangin fimkhur a ngai hle. Mihringa sumdawnnaah hi chuan invenna lam hi sawi uar a lo ṭul tawh hle tih a lang a, thubuai ziah luh heti zat a awm chuan, man chhuah loh leh a tuartu ngei pawhin a thup hlen tak tam tak a awm ngei ang.

Mihringa sumdawnnaah hi chuan mi inrawlh pathum an awm tlangpui a, a hralhtu mihring leh a leitu an awm a, chumi karah chuan an hralh ṭhin mihring an awm bawk. A tuartu ber, mihring an hralhate hi mi hnuaihnung leh enkawl ngai, mirethei zawk leh puih ngai an ni tlangpui a, hmeichhia an tam zawk zel bawk. Hei vang hian mihringa sumdawnna hi chu sualna dang nen a inang lo a, thil thleng tam a nih loh pawhin a thleng chhun hi ngaihthah chi a ni lo a, pawi khawihtute hi man chhuah zel an ṭul takzet a ni.

Mizorama mipui tam zawkin kan ram harsatna a la ni loa kan hriatlaiin police record kan en chuan mihringa sumdawnna kaih-hnawihah heti zat zet hi harsatna a lo awm tawh a, police beng thleng lote nen phei chuan case tam tak a awm tawh ngei ang. Hei vang hian mihringa sumdawnna do tur hian kan zavaia kan inbuatsaih a, hetiang lam hawi rinhlelh kai an awm chuan thuneitute hnena hrilh a, a tuar theitute hnena zirtirna ṭha pek zel hi kan mamawh hle a ni.