Mistiri training

Labour Employment & Industria Training (LE&IT) minister chuan tun hnai khan Mission Foundation Movement leh North East Rural Livelihood Programme (NERLP) ṭangkawp buatsaih mistiri training thla thum awh tur chu tun hnai khan a hawng a, "Kan ramin mistiri hi kan la mamawh zel dawn a, chuvangin in thil zirah thiamna bakah quality lam ngaih pawimawh a pawimawh," a ti.

A loa kan awm theih loh, kan ngaih-thah nia lang si chu mistiri hna hi a ni. Heti khawpa ram tana mi ṭangkai ni si hi a zirna mumal taka kalpui pawh hi an tlem hle a, mahni thiam thiama thiam chhote hi kan chhawr mai
ṭhin a, hei hi kal dan fuh ber a ni lo.

Pawl tlem tê hetiang lama ṭha-hnemngai an awm a, tlawmngai pawl leh kohhran thlenga mistirti hna ngai pawimawhte pawh an awm ṭan a, a lawmawm khawp mai. Khawvel awm chhungin in sak, lung rem, lei dawh, furniture siam leh mistiri hna dangte hi a tawp dawnin a lang lo a, awmze nei zawka kalphung ṭha tak nena kalpui hi a hun tawh takzet a ni.

Tunah hi chuan mistiri hi a zira zir loin mahni thiam thiama thiam chho ve mai kan la ni fur a, hnam dang kan chhawrte pawh hi Mizorama an lo luh hnua anmahni kaihruaitute hnen aṭanga inzir chawp an ni deuh fur. Heng pianpui thiamna hi ṭha bawk mah se, mithiam zawkten ṭha taka an zirtir chhuah hi an tloin an rintlak zawk ngei ang.

Mistiri hna hi hna zahawm tak a ni a, ram hmasawn zelah kan tihhmasawn a ngai a; engineer, architect leh mithiam dangte kaihhruaina hnuaiah mistiri training hi neih zel theih ni se a ṭha ngawt mai.