Leilung leh ramngaw humhalh

March 21 kha International Forests Day a ni a, Mizoram hmun ṭhenkhatah hman a ni. Leilung leh a chhunga awm te, ramngaw leh nungchate hi Mizoram thil neih hlu ber berte an ni a, a humhalh kawnga mawhphurtu pawh Mizoram mipui kan ni.

Mizoram ro hlute hi Mizo mipui hian ṭha taka humhalhin kan duat tur a nih laiin, duat nacháng kan lo hriat loh ṭhin avangin tunah hian a nghawng ṭha lo kan tuar mek. Mizoram pumah tui harsatna kan tâwk na tial tial a, a chhan chu tuihnâ a tlem tial tial vang a ni. Tuihnâ a tlem chhan chu ramngaw humhalh nachâng hre loa kan tihchereu nasat vang niin mithiamte chuan an sawi.

Tunah hian leilung, ramngaw leh nungchangte humhalh a ṭulzia Mizoram mipui zinga tam takin an hre thar a, ṭhahnemngai takin hma an la a, mipui zirtirna lamah pawh an ṭang hle. Mahse, mipui náwlpui erawh kan la harh tâwk lo niin a lang.

Thingtlang mipui tam takin tláng ram loneih an bànsan ngawt thei lo. Chuti chung chuan leilung, ramngaw leh nungchate chhe zual zel vên kawngah tih theih an nei ve tho. Vah bâk ram tikâng lo turin fimkhur lehzual chungin nasa zawkin hma an la thei a; thil dangah pawh tih theih tam tak an nei ang.

Kan ram ro hlu, thing leh mau, leilung leh nungchate hi humhalh turin nasa lehzualin ṭan la ila; ramngaw siam belh tur pawhin nasa zawkin ṭan la thar zel ang u. Nasa lehzualin mipui zirtir ni se; sorkar, kohhran, pawl leh mimalte'n kan theih tâwk ang zelin nasa zawkin ṭan la ṭheuh se. Sorkarin dan a neih ang angte khauh lehzualin kengkawh se. Mahni hmazawn ṭheuhah kan ṭan tlàn chuan Mizoram hi ram nuam zawkah kan chan ngei ang.