Hnam nun phung leh zia inhriatsak

Sorkar laipui hmalaknain Ek Bharat Shrestha Bharat kalpui a ni a, India rama state leh union territory hrang hrangte din champha chu state dangahte pawh hman tura tih niin, hnam nun phung leh ziate chawisanna leh inhriat tawnna tura ruahman a ni. Mizoram State Day (February 20) pawh state hrang hrangah governor-te hoin hman a lo ni tawh.

Mizoramah pawh kan Governor hoin Raj Bhavan-ah state hrang hrang din champha lawm a ni ṭhin a, chutah chuan state day lawmna state mi leh sa, Aizawla awmte an tel ṭhin a, an hnam lâmte an entir ṭhin. Mizo ṭhalaite'n Mizo hnam lâmte an entir ve bawk ṭhin.

March 22, 2024 pawh khan Raj Bhavan-ah Governor Dr Hari Babu Kambhampati hoin Bihar state din champha, Foundation Day of Bihar (Bihar Diwas) lawm a ni a, Aizawla Bihar mi leh sa awmte'n an hnam lâmte an entir a, Mizote'n Mizo hnam lâmte an entir ve bawk.

State dangahte pawh kumina Mizoram State Day kha governor-te hoin lawm a ni a; an lawmna state-a Mizo awmte an tel a, Mizo hnam làm leh zaite an entir deuh zel.

Hnam tin hi mahni hnam bil chauha khawsak theih a ni lo a, hnam dangte nen kan inawm pawlh a, kan chênho a ṭul a. Hnam hrang hrangte inngeih tlang taka kan chênho theih nan hnam nunphung leh zia inhriatsak tawn hi thil pawimawh ber pakhat a ni ngei ang.

Sorkar laipui hmalaknaa India rama state leh UT-te din champha state danga lawm a ni ṭhin hi a hlu hle. India ram hi hnam hrang hrang, hnam nunphung leh ze inang lo tak tak awm khawmna a ni a, hnam hrang hrangte hi lungrual leh inngeih tlang taka kan chenho theih nan leh kan hnam zia ṭheuh kan inhriatsak tawn theih nan state day kan inlawmsak tawn hi thil ṭha tak a ni a, kalpui chhunzawm zel tlâk a ni.