Lengpui Airport chei ṭhat hnathawh

Lengpui Airport chei that mek a ni a, hna chi hnih awmin, contractor pahnihin an thawk. Contractor pakhat chu a huna zawh hman loh vangin vawi thum hun pawhseisak a ni tawh a; contractor pakhat zawk pawh vawi khat pawhseisak tawh niin, hun pawhseisak leh tura buaipui mek a ni.

Airport chei ṭhat hna thawh mek a muan chhan lian ber chu Covid-19 hripui léng vang a nih thu sawi a ni a; hei hi a dikna chen a awmin a lang. Chutih rualin, chhan dang a awm mai thei bawk. Mizoramah hmasawnna hna thawh reng reng a huna zawh a awm lo emaw tih tur khawpin hna a muang ṭhin a; chu chu Lengpui Airport chei ṭhat hna thawhah pawh mipui ngaih tiṭha lotu pakhat a niin a lang.

Lengpui Airport chei ṭhat chungchang hi hna thawh ṭan a nih aṭangin sawi neuh neuh a tam a. Hna thawktu tur thlan danin sawi a hlawh a, hna thawh mek laiin hnathawh lai chim a awm bawk nen, contractor-te'n hna an thawh danin sawi a hlawh hle bawk. Mi tam takin hna a ṭha tâwk loah an ngai niin a lang. Siam tel tur, estimate-a awm vek zingah siam tel loh a awm nual thu Chief Minister-in kum tir lamah a sawi chhuak bawk.

Lengpui Airport hi thlawhtheihna ṭum hmun kan neih chhun, Mizoram rohlute zinga mi a ni a, Mizoram tan mai ni lo, India ram tan pawh ram venhimna thilah airport hlu bik a nihna pawh a awm. Chuvangin, Lengpui Airport hi ṭha taka enkawl a, changkang leh changtlung thei ang bera thuama enkawl a ṭul takzet.

Tuna Airport chei ṭhat hna thawk mektute'n an hlêp tam theih dan tur ringawt ngaihtuah loin, ram rohlu a ni tih hriain tun aṭang chuan a ṭha thei ang berin, mipui sawisel tur awm lo turin thawk se. Sorkar thuneitute pawhin uluk leh khauh lehzualin vil se. Airport changtlung leh changkang zawk nei turin mawhphurhna neitu zawng zawng an ṭan lehzual a ngai a ni.