Speaker leh MLA thu inchuh

Mizoram Legislative Assembly Speaker chuan March 23, 2024 khan Tuichawng bialtu MLA Rasik Mohan Chakma chu MLA nih leh Chakma Autonomous District Council (CADC) chief executive member (CEM) nih a kawp avangin MLA aṭanga bàn a nih loh chhan sawifiah turin a tun hnai khan a hriattir. RM Chakma erawh chuan dan a bawhchhiat loh thu a sawi thung.

Speaker-in a tarlan dan chuan, MLA RM Chakma chu CADC CEM ni chunga MLA a ni reng chu dan bawhchhiatna a nih avangin, dan angin MLA aṭanga bàntir theih a nih thu a hriattir a; dan a tlawhchhan chu The Mizoram State Legislature Members (Removal of Disqualification) (Amendment) Act, 2006 a ni.

MLA RM Chakma erawh chuan dan bawhchhia ni se chuan a bàn daih tawh tur thu leh, dan angin MLA leh CADC CEM a nih a phalsak thute sawiin, chumi avang chuan bàn kher ngai a tih loh thu a sawi a; chutih rualin, a insawifiah dawn thu a sawi bawk.

Assembly Speaker leh MLA RM Chakma inkarah thu inchuh a awm ta mek a, Speaker leh MLA hi dik zawkah an inngai ve ve a, mipui náwlpui tan chuan tu zawk nge dik a, tu ṭan chhan nge dik zawk tih hriat a har hle. Tu emaw zawk chu a dik a, tu emaw zawk chu a dik lo ngei ang le.

Eng pawh ni se, thu inchuh awm mek hi thil lian tham a ni a, MLA emaw, district council-a CEM emaw nih leh nih loh hril thei a ni. MLA hi a dik lo a, dan kalha a awm a nih chuan a chungah dan ang taka chêt a, action lak ngei ni se. Chutih rualin, MLA nih leh CEM nih chu danin a phalsak chunga show cause notice hial pek a nih erawh chuan a tan a mualphothlak a, Speaker pawhin ngaihdam a dil a a ṭulin a rinawm.