Lok Sabha inthlan leh MKHC thuchah

Mizoram Kohhran Hruaitute Committee (MKHC) chuan April 19, 2024-a Mizorama Lok Sabha MP inthlanpui awm tur pualin inthlan thuchah an tichhuak leh ta a, tun hma pawhin ram pum huap inthlan leh inthlan lian thamah chuan thuchah an lo tichhuak tawh ṭhin.

MKHC ngenna - zalên tak leh duh thlanna dik hmanga mi tinin vote an thlâk theihna tura hel pawl leh rálthuam lam chi hman te, invau te, inbum te, sum semte leh thil ṭha lo dangte ti lo tura political party-te leh mipui an ngenna hi a pawimawh hle.

Tun hma deuha Mizorama inthlanpuiah silai leh rálthuam dang hmanga invau te, silai mu sem te, bomb puak tihte hriat a lo ni tawh ṭhin. Hmun ṭhenkhatah chuan mipui nun a rálmuang lo a, hlauhthâwng takin mipui an awm a, an duhthlanna an hmang ngam lo ṭhin; a pawi a, a râpthlâk bawk. Khatiang thil kha tun hnai hun eng emaw ti chhung chu hriat tur a awm ta lo a, a lawmawm hle - MKHC leh Mizoram People Forum hmalakna rah chhuah a nihte pawh a rinawm.

Tuna MKHC ngenna ang tak hian Mizoramah hian inthlan hi kalpui ni ngat se chuan India ram mai ni lo, khawvela inthlanna felfai, thianghlim leh muanawm ber kan nei ngeiin a rinawm.

Chutih rualin, MKHC ngenna hi duhthusam ang deuh a ni a, a tak taka tihhlawhtlin harsa tak a ni. A chhan chu - political party te, an candidate-te leh party mi leh sate hian an zawm famkim tak tak duh loh vang a ni tlangpui. Party mite leh candidate-te'n mawh an phurh nasat rualin, mipui náwlpui pawhin mawh an phur ve bawk. Inthlanna thianghlim leh zalên a awm theih nan party mi leh sa te, candidate-te leh mipuiin mawhphurhna kan nei vek a ni.