MP thlanah ngaihtuahna fím hman

Mizorama Lok Sabha inthlan turah candidate mi paruk an awm dawn tih a chiang ta a, hei hi inthlan hnuhnung ber, kum 2019-a candidate awm zat chiah a ni.

Mizoram MP nih tuma inzuar mek mi parukte hi mi ṭha tak tak vek an niin a hriat a, an hmazawn ṭheuhah mi taima, ram tana ṭhahnemngai tak vek an niin a lang. Mi ṭha, ram vei mi leh ram tana ṭhahnemngai tak vek an nih a rinawm rualin, tuna an tih theih chin erawh an inchen lo hlawmin a rinawm a, MP an nih hnuah pawh an tih theih chin a inchen lo viau bawk ang.

MP candidate-te hian MP nih an duh chhan leh thil tum an nei vek mai a, candidate ṭhenkhat chuan an thil tum an sawi chhuak tawh. MP nih an tum chhan leh an thil tumte chu ṭha tak vek a ni a, MP atan pawha mi duhawm tak vek an ni - MP nih an tum chhan leh an thil tumte thlirin.

Chutih karah chuan thil tum ril zawk, mipui hriata sawi chhuah duh lohte pawh awm thei a ni ve bawk. Chutiang a awm a nih chuan ram leh mipui hmasawnna lam aiin, mahni, vua leh vângte hamṭhatna tur rilru-ah a awm zawkin a rinawm a, hlemhlêtna a hnai bawk ang.

Eng pawh ni se, Lok Sabha MP thlan hi mipuiin kan ngai pawimawh tur a ni a, vote kan thlâk ṭheuh a pawimawh. Kan MP thlan chhuah chu Mizoram leh Mizo mipui aiawha Parliament-a ṭhu tur, ram leh hnam tan a tak taka che tur a nih avangin rilru fím taka ngaihtuah chunga vote thlâk a ṭul.