Sorkar kum thar

Nimin April 1 kha sorkar kum tia sawi mai ṭhin, financial year thar inṭanna a ni a, financial year 2024-25 kan hmang ṭan ta tihna a ni. Sorkar kum liam ta 2023-24 sum zingah hman hman loha liam ta (lapse) a awm loh turah ngai ila, a lo awm palh a nih chuan sorkar tan mualphona lian tak a ni ang.

Financial year thar a inṭan a, sum chungchangah pawh budget session hnuhnung ber tàwp ni, March 13, 2024-a Assembly House-a pawm tâk hman ṭan a ni tawh ang.

Tuna sorkarna chelh mektu ZPM party kaihhruai sorkar hnuaia budget hmasa ber a ni a. Department hrang hrangte sum chan zat tur ruahman a nih laiin; ZPM hian sorkar an la siam hman lo a ni mai thei a, chuvang chuan sum bithliah danah an duhthusam ang tak a la ni lo mai thei bawk. Mahse, an sorkar hnuaia budget siam leh pawm a nih avangin ZPM ministry kutchhuak budget ngei a ni a; an duh ang tak leh an duhna taka an hman theih sum ruahman a ni. Budget-a sum ruahmante hman dan leh a nghawng chhuahte pawh sorkarna chelh mektute dinhmun hriltu a ni dawn. Chuvangin, dik tak leh ṭha tak sum an enkawl a, an hman a, Mizoram hi hmasawnna kawng min zawhpui ngei mipuiin an beisei a, an lo thlir reng dawn a ni.

Kum 2024-25 Mizoram budget pumpui hi cheng vbc. 14,412.12 a ni a, chu'ng zinga 80% chuang chu sorkar inrelbawlna leh hlawh hrang hrang atana hman tur niin, hmasawnna hna thawhna tur chu 20% pawh tling lo a ni. Hmasawnna hna thawhna tur sum hi a tam tawk loin a rinawm a; chutih chung chuan, eirukna tel loin, dik takin sum hman ni phawt mai se, ramin hma a sawn phahna khawp erawh a ni ngei ang.