Lirthei insurance chungchang

Sorkar kum liam ta, 2023-24 chhung khan Transport department hnuaia Aizawl Enforcement staff-te'n lirthei dan bawhchhia an mante sum chawi tling khawm chu cheng nuai 120.20 a tling. Lirthei dan bawhchhia man zingah insurance fel lo leh thi tawh a tam ber tih Transport department hotute chuan an sawi.

Mizoramah hian motor insurance ti lo an tam thaw khat hle niin a lang a, lirthei tax leh fee dang dang pêk hreh lo tak tak zingah pawh insurance tih hreh deuh tlat mi tam tak an awmin a hriat. Insurance tih hi sum sên thlawnnaah mi tam takin an ngaih vang niin a lang.

Mizoramah hian insurance company an awm ve nual a, ṭhenkhat chu sorkar hnuaia mi an nih laiin, ṭhenkhat chu private firm an ni. Mizo mipui rilruah hian lirtheia chetsualna emaw a thlenin, lirthei chu insurance nung thlap pawh ni se, sum hmuh lêt a harsa a, insurance company lamin harsatna hrang hrang siam an chíng a, phût eng eng emaw neih an chíng tihte hi Mizo mipui tam tak rilrua awm lian tak a ni.

Hetiang rilru a awm chhan hi Mizo mipuiin ngaihdan dik tâwk lo kan neih vang a ni thei a, insurance company-te thil lo tih tawh danin a hrin chhuah a ni thei bawk.

Danin a phût tlat lirthei insurance tih hi Mizo mipuiin an hreh loh nan leh phûr taka an tih theih nan company lam an inhawn a ngai. Insurance claim a awmin, tihhlawhtlin loh dan ngawt zawng loin, tihhlawhtlin theih dan kawng an zawng zawk tur a ni.

Sorkar pawhin tih tur chin a nei ang; khua leh tuite'n harsatna an tawh lohna tur leh an awlsam zawkna turin, lirthei insurance chungchangah hian tih tur a awm phawt chuan bawhzui se a ṭha hle ang.