Social media-a thlalak thehdarh

Aizawla social activist pakhat chuan hmeichhe pakhatin hursualna lam rawngkai video a siam leh tihdarh a nih chungchangah April 2, 2024 khan Cyber Crime Police Station-ah report (FIR) a thehlut. FIR-a tarlan danin, Zobawk khaw mi hmeichhe pakhatin video clip a siam ṭhin a, video-ah chuan a serh pawh a tilang ṭhin a, zu a in laite a tilang ṭhin bawk.

Tun hma deuh aṭang tawhin social media-a chêt dan avangin cyber criminal case a awm tawh ṭhin a, tun hnaiah a pung zual. Hei hi social media chi hrang a tam tial tial vang te, internet a chak ṭhat tial tial vang te, smartphone hmangtu an pun zel vangte a ni ang.

Information technology-a hmasawnnain chak takin min rawn nuai thut a, Mizo mipui tam tak chuan a hman dan tâwk leh tih àwm leh àwm loh pawh hre chiang hman loin kan hmang nghal bawrh bawrh a. Hetiang a nih avang hian mi ṭhenkhat chuan an hriat hauh lohin dan an bawhchhiat phah a, thubuai an neih phah ta nawlh nawlh mai niin a lang.

Mimat hmeichhiatna lam thil social media-a thlalak (video & still) darh a tam tawh hle a, social media-a pût chhuak ve tho si, darh hluai lem lo leh mi náwlpuiin an hmuh phak loh tam tak a awm bawk niin an sawi ṭhin. Saruak thlalak thehdarh hi danin a khap a ni; mahnia saruaka thla inlâk a, mahni duh thu ngeia thehdarh pawh thubuai neih theihna leh hrem theih a ni tih i hre chiang ang u.

Social media hman danah mi tin an fimkhur a ngai. Tleirawlte leh ṭhalai, rilru la puitling tâwk lote hi smartphone leh social media an hman thiam lutuk avangin an fimkhur a, vênpui an ngai a; rualú deuh zawk, pavalai rual kan tih ang chite hian hman dan an thiam tâwk loh avangin an fimkhur zual a ngai bawk àwm e.