Sakhua leh politics

North East India Christian Council (NEICC) chuan, BJP MP Satya Pal Singh-a'n September 21-a Parliamant House-a Kristiante chu FCRA sum hmanga hel ṭanpui ṭhina a puhna leh, 1999-a Odisha-a Australian Kristian missionary an hal hlum tak Graham Staines chanchin mawi lo taka a sawinate chu an ngaimawh thu Lok Sabha Speaker Om Birla hnenah an thlen a, record aṭanga thaichhe turin an ngen. 

India rama thil thleng mek duh­awm lo tak chu sakhuana zawna politics khel a, sakhaw dangte ngai­thei lo leh an tana hnawksak tura poli­tical party lian ber an awm ta fo mai hi a ni a; India ram hi sakhaw pakhat rorelna hnuaia dah a, chu chu a hlawhtlin theihna tura sorkar chakna hial pawh hman an hnial lo a ni ta ber mai. 

Tun hnaia BJP MP pakhat thusawite phei hi chu Kristiante leh hel pawl inzawm anga puhna leh, Kristian missionary chhuanawm ber pawl chu tihluihnaa sakhaw inlehna kalpuitua puh a, mipat hmei­chhiatna kawnga hmeichhe naupangte laka mawi lo taka khawsaa puhna a ni. Hei hi Kristian tawh phawt tan chuan ngawih bopui mai chi a ni lo a, thudik puang chhuak tur leh Lok Sabha Speaker hnena a thusawi thaichhe tura NEICC-in lehkha an thawn hi a lawmawm takzet a ni. 

Hetihlai hian state dang pawhin 'Kristian state' an tih tur khawpa Kristian hlang awmna state kan la ngawi tlat erawh a inhmeh lo deuh a; kan MP neihte pawhin hetiang thu hi lo hnial a, thudik zawk au chhuahpui hi an tih ve theih a ni. Parliament ṭutkhawm awm leh hunah tal Kristian thlavang hauh turin au chhuak ve se Mizoram MP tih atan thil inhmeh tak a ni ang. 

He thu sawi chhuak­tu hi BJP MP a ni a, chu chu NDA tihna a ni. Kan MP-te hi NDA lam ni tho mah se miin an sakhaw chawi san duh avanga kan sakhaw vawnlai an sawi chhia a nih chuan, politics-a kan ṭanna lama mite mah ni se huaisen taka dodal a, thudik puan chhuah ngam hi Mizo Kristian MP tih atan thil inhmeh tak leh tihâwm tak a ni ang.