Pisaa complaint box dah

Land Revenue & Settlement Secretary chuan tun hnai office memorandum chhuahin, LRS department hnuaia settlement officer-te chu anmahni dawrtute'n vuivaina an thehluhna tur báwm (complaint box) siam a, pisa tinah húng turin a hriattir. Chief Minister pawhin December 8, 2023-a sorkar lak luh zawha press conference-ah, sorkar thara minister tin pisaah complaint box leh suggestion box an dah dawn a, rawt duh leh sawisel duh nei tan thlen theih a nih dawn thu a lo sawi tawh.

Chief Minister-in thu a tiam nía complaint box chungchang a sawi leh LRS department-in an pisa tinah complaint box dah tura thupek an chhuahte hi a lawmawm hle. Mipui tana ṭangkai tur a ni a, sorkar hotute hnena sawi duhte leh rawt duhte inthlahrung hauh loa mi tinin an sawi theihna tur remchang a ni.

Minister pisa tina complaint box dah tura tih hi minister tinin an la tihlawhtling vek loa sawi a awm; a dik a nih chuan tihhlawhtling vat se a duhawm hle. CM-in ni 100 chhunga an tihhlawhtlin tur a sawi zinga mi a ni a, tunah chuan ni 100 a liam daih tawh.

Revenue department-in an pisa tina complaint box dah tura an inhriattirna pawh hi tihlawhtling vek ngei se. Sorkar department dang tan pawha tih atana thil ṭha tak a ni.

Minister office-ah a ni emaw, department-ah a ni emaw, complaint box dah ringawtah duhtâwk mai loin, ṭha taka vil zui ni se, mipuiin thil an thlente uluk taka ngaihtuaha bawhzui ṭhin ni se. Thu lut aṭangin insiamṭhatna tur tam tak a awm thei ang a, inenfiahna ṭha tak pawh a ni ang. Insiamṭha ngam tur pawhin hotute rilru inhawng se. Sorkar hotute, sorkar hnathawkte leh mipui tana ṭha, hmasawnna thlentu a nih ngei a beiseiawm.