Lo hal hun zawm

March 15 hmaa lo hal tura sorkar thuchhuah zawm lotu mi eng emaw zat chu Mamit Police-te'n an man a, bail-a chhuah an ni. Heng mite hian lo hal hun tawp ni hma lawka ruah a sur vangin lo an hal thei lo a, sorkar thu zawm loh an tum vang reng a nih loh thu an sawi.

Sorkarin lo hal hun a siam hian chhan hrang hrang a nei a, kangmei laka kan him tlan zawkna tur te, lo hal khuin hun rei tak min tihbuai lohna tur te, harsatna dang thleng theite pumpelhna tura tih a ni.

Sorkar hun bituk hi zawm a harsa a nih pawhin zawm theih loh chu a ni lo tih a chiang a, mi tam zawkin sorkar hun bituk chhungah lo an hal thei. Mi ṭhenkhat erawh chuan mahni remchan hun hunah lo hal an tum mai ṭhin a, sorkar thuchhuah an ngai pawimawh lo ṭhin hle a ni.

Lo hal chungchang a ni emaw, eng thilah pawh sorkarin khawtlang himna leh ṭhatna tur zawka ruahmanna a siam hi chu zawm hram hram a ṭha a; mahni duh anga thil kalpui hian khawtlang tan thil ṭha lo zawk a thlen thei.

Kuminah chuan March thla laihawlah ruah a tlak avangin sorkar thu hi zawm lo an awm a ni mai thei a; nimahsela mi ṭhenkhat hi chuan sorkarin lo hal hun a siam hi engah vak an ngai lo ṭhin.

Lo hal hun hi siam a nih leh chuan ṭha taka zawm tlan ni se, a zawm duh lote pawh dan anga hrem ngam zel ni se, hei hian kum lo kal zelah lo hal huna ruat ngai pawimawh turin mipuite a zirtir theih a beiseiawm.