Chhiatrupna hmachhawn dan

Disaster Management & Rehabilitation department (DM&R) hotute leh 1st Bn. National Disaster Response Force (NDRF), Guwahati hotute chuan tun hnai khan Raj Bhavan-ah Governor Lt. Gen. Nirbhay Sharma an kawm a, khuarel chhiatna lo thleng theite rilru inpuahchah lawkna nena mipuite'n an hmachhawn theih dan tur an sawiho.

Chhiat rupna thleng thei laka inven dan sawiho hian mi ṭhenkhat chuan insawiṭhaihna angah an ngai ṭhin a, a zialo hle a ni. Khuarel chhiatna hrang hrangte hi engtikah nge a thlen dawn hriat theih a ni lo a, hriat theih ni se inven dan dan a awm a, a thlen hun a hriat theih loh avang tak hian rilru lam inbuatsaihna nena inven lawk hi a pawimawh takzet a ni.

Kumin chhungin mipui hriat theihah Mizoram hi lirnghingin ṭum hnih a sawi ta a, thil tihchhiat lian tham nei lo mah se mipui chu a tichiai hle a ni. Tun hnaia lirnghingin Mizoram a sawi khan, chhiatrupna thleng thei laka inven dan zirtirna kal uarpui a ṭulzia a takin a lang.

Kan himna tur leh inven dan kan hriat vek loh avangin inven kan tumna lamah ṭhenkhat an inti palh a, hriat loh vangin hlauhawm lo pui kan hlau a, hlauhawm hlauh nachang kan hre lo ve thei bawk a, mipui nawlpui hriatthiam zawnga zirtirna kalpui hi chu a ṭha khawp mai.

Thil pawimawh tak chu rilru lam inpuahchahna ṭha neih hi a ni a, chutiang tur chuan mipui nawlpui hriat theiha zirtirna kalpui thiam a ngai. Ram danga an tih ang apiang hi kan ramah chuan a remchang lo mai thei a, Mizoram mila chhiat rupna a thlen thulha mipuite zirtirna hi duan chhuah theih ni se a ṭangkai hle ang.