MPSC rinhlelhna chungchang

Mizoram sorkar hnathawk turte lakna kalpui ṭhintu Mizoram Public Service Commission (MPSC)-in MCS (Combined Competitive) Examination 2023 a buatsaihah thil fel lo a awm nia ngaiin MZP chuan MPSC Chairman báng turin an phût. Puh an nihna chu MPSC Chairman chuan April 5, 2024 khan press mite hmaah a sawifiah a; MPSC-in exam a kalpui dan an sawifiah bawk.

MPSC-in written exam an buatsaihah scrutiniser-te'n final mark an siamah belh emaw, paih emaw MPSC Office-in a neih ngai loh thu MPSC hotute chuan an sawi. Hei hi tun hma aṭanga an kal dan a nih a rinawm a, thil ṭha tak pawh a niin a lang. Mahse, Combined Competitive exam hnuhnung bera chhanna endik dan leh mark pek dan chu mi ṭhenkhatin an ringhlel tlat mai a, an rinhlelhna hi thil àwm lo a ni bik lo.

MPSC hian 'A dik chauh ni loin, a lang dik tur a ni' tih chu thupuiah a nei a; a pawimawh hle. Mi rinawm tak pawh hi miin rinawm loa an ngaih tlat a, sum tichingpen miah lo pawh miin sum tichingpen ṭhina an ngaih tlat chuan a fuh lo ṭhin.

Chutiang bawkin, MPSC pawh, tih dik loh an nei lo a ni thei a, mahse, miin 'fair' lo taka hna lâkna kalpui ṭhina an ngaih tlat chuan a pawi hle dawn a ni. Mi rin loh nih hi a pawi a, mi rin ni leh tur chuan hun a duh rei em em.

Dik taka sorkar hna lakna kalpui tura ngaih leh kalpui tawh tawh ṭhin MPSC-ah rinhlelhna a awm hi a pawi hle mai; nakin zel thlengin miin an rinna an hloh a hlauhawm hle.

MPSC hi an fimkhur lehzual a ngai a, tuna mi ṭhenkhatin an rin lohna pawh hi a dik lo a nih chuan a dik lohna fiah taka an tihlan a ṭul ngei dawn a; mi rin hlawh tura theihtawp an chhuah zui a ṭul àwm e.