Medical reimbursement

Sorkar hnathawkte'n an-mahni leh an chhungte an damlohna thila an inenkawlna senso an bill theihna (medical reimbursement)-ah dan thar duan mek a ni a, dan thar hi hman a nih hunah chuan MR bill atana sum sen a tlem sawt dawn bakah, Medical Attendance Rules hman a ni tawh dawn tih Finance minister chuan a sawi. Medical reim-bursement dan hmanlai hian ṭhat lohna tam tak a nei tih chu tuna sum che velah hian chiang takin a lang a, MR zar zo phak tur ni lo mi tam takin MR bill an la a, chumi piah lamah bill siam chawp leh dik tawk lo pawh tam tak a awm ṭhin.

Khawvel hmun dangah pawh an ngaih pawimawh chu damloh nikhuaa inenkawlna hi a ni a, heng atan hian sorkar hrang hrangin kalphung fel tak a nei
ṭhin. Mizoram sorkar hnuaiah hi chuan MR bill theih dan kawng hi a inhawng zau mah mah niin a lang a, sorkar hi pawisa pe chhuaktu kang chat thei lo anga ngaiin kan ren lo hle a ni.

Mizoram sorkar sum dinhmun dik tak hailan a ni a, sorkar laipui lamin sum a pek chhuah dan kalphung a thlak a, sorkarin inrenchemna lam a hawi ṭan ta. Mizoram sorkar sum tam tak luan ralna MR kalphung hi siam ṭhat ngai tak zinga mi a ni reng a, sorkar hi fimkhur leh fet deuh zawka a kal chuan sum luangral tur tam tak hi dan theih a nih hmel.

Hetihlai hian sor-kar hian state pawn damdawi-in a thawhpuite pawh hi ennawn se, damlo an enkawl danah a ṭul bak thlenga thil test leh inenkawlna ṭul chiah lo thlenga tihte sawi a awm ṭhin. Heng damdawi-inte hian Mizoram sorkar sum hi an ren lo hle tih a chiang a, hengte thleng hian vil uluk deuh a ṭha ang.

Engpawhnise tuna kan kalphung anga MR bill hi chu a ṭha tawk lo a, sorkarin ennawn a tum hi a lawmawm a, nakin zel thlenga state tana ṭha ber tur ngaihtuahin kal rawh se.