Sorkar doctor

Health minister chuan, sorkar hnuaia thawk doctor-te chu doctor hna chu sumdawnna anga ngai lo turin a chah a; Aizawla awm vek chu thil theih loh a nih thu sawiin, transfer leh posting-ah harsatna siam lo a, sorkar thutlukna zawm thiam turin a chah.

Mizoram sorkar hnuaia doctor-te hi sorkar doctor-ah chuan a thawk ṭha leh chhuanawm pawl tak an ni hial mai thei a, India ram state danga sorkar damdawi-inte hi a
ṭawpin inenkawlna a fel lo ṭhin hle. Mizoramah chuan sorkar damdawi-inte hi kan rinpui ber, kan doctor thiam zawng zawng awm khawmna a la ni a, mipui tan an hlu hle a ni.

Hetihlai hian sor-kar doctor-te hian anmahni eizawnna piah lamah private-in hna an thawk tel a, hei hi sum an hmuhna kawng khat a nih piah lamah mipui mamawh vang pawh a ni tel. Sorkar damdawi-ina an thawh chhung chiah chhawr theih ni tak tak dawn se a tuartu tur chu mipui zawk hi kan ni a, kan sorkar doctor thiamte tel lo hi chuan kan buai dawn hle a ni.

Hei hian sorkar doctor-te hi private-a an thawh hi danin a phalsak ta tihna a kawk chuang lo a, non practicing allowance la chunga thawhte phei chu a inhmeh lo hle. Mahni hna pawimawh hmasa (sorkar hna) zawk tlai fo leh hlamchhiah khawpa pawn lam hna thawh te, private lama a hlawk zawk dawn avanga damlo ṭhenkhat private lama enkawl tura rawnte phei chu tih loh tawp tur a ni ang.

Sorkar doctor zinga harsatna lian tak awm chu khawpuia awm ṭheuh duhna hi a ni a, hei hi department dangah pawh an harsatna a ni. Doctor hi chu an awmna hmun tura an awm lohin mipuiin an tuar zual bik ṭhin a, doctor ṭha apiang khawpuia an awm zel chuan thingtlang mipui tan chuan a manganthlak hle dawn a ni.

Sorkar doctor-te tel lo hian Mizo mipuite hi an khawsa thei lo a, state dang ang lo takin private doctor-te aia rin hlawh zawk leh mipui innghahna an ni. Hei vang hian taima tak leh thuawih takin an hna thawk se, sorkar hnuaia an awm duh a nih chuan sorkarin a phût leh a beisei angin hna thawk se, mipui tan malsawmna ni zel rawh se.