Zirlaite tan chona

Kolkata-a US Consul General Craig L Hall chuan tun hnaiah Mizoram a tlawh a, US Embassy-in 'Education USA' a buatsaih
ṭhin tih sawiin, "Mizo ṭhalaite US-a zirna sang zawk an zawm duh chuan Fullbright-Nehru programme kaltlangin a zir theih. Kum 10 kal ta khan US-a India mi zirlai awm zat chu 35,000 a ni a, nikum khan US-ah India zirlai 1,30,000 an tling tawh," a ti a, zirlaite chu Fullbright-Nehru programme ngaihven turin a chah.

Mizoramah uni-ver-sity kan nei ve ta a, khawvel hmun danga mi thiam tak takte pawhin an tlawh ve ṭhin a, India ram chhunga mi pawimawh ber ber pawh an sawm chhuak thei. Tun hnaia MZU tlawhtu US Consul General chuan Indian zirlaite tana USA-a zir theihna remchang, Fullbright-Nehru programme chu ngaihven turin Mizo zirlaite a chah a, hei hi MZU zirlaite leh Mizo zirlai dangte hian ngaihthah lo se a ṭha khawp mai.

Mizote hi kawng engkimah hmasawn chak ve hle mah ila khawvel pum huap chu sawi loh, India huap pawh hian zirna lamah hian kan la hnufual khawp mai. Thiamna lama intlansiaknaah hian kan lang phak meuh lo a, tribal quota kan tih mai ṭhina seat min pekna UPSC hnuaia exam sangah pawh kan lang ta meuh lo. Hetihlai hian tunlai khawvel changkanna dang hi chu kan man chakin kan nunpui ve nghal mai thei lawi si a, thiamna lamah erawh kan la sang lo khawp mai.

Zirlaite zingah hian hnam dang elna tak tak hi a awm tlem hle mai a, Mizoram chhunga a berte hi India ramah hian an la sang tawk lo hle tih inpawm ila, zirna sang zawk hmachhawn turin insangmar ang u. Zirlai pawl kan neih vete pawh hian helam hi ngaihven zawk se a ṭha a, zirna nena rem vak loa sawi pawlh theih hram hram thil dangah an inhmang na zawk a, a lehkhathiamna lama zirnaah tak tak hian Mizo ṭhalaite tan hma an la chak tawk lo niin a lang.

Tuna Fullbright-Nehru programme tihte pawh hi hnam dangte chuan an lo chhawr ṭangkai tawh a, USA-a Indian zirlai an pun chakzia en hian Mizote pawh kan tel ve zel a ṭha hle. Mizo zingah India ram huap intihsiakna kal tlanga zirna sang zawka kal thei te, India ram huap hna sang thawk tura intihsiaknaa tling thei hi an tlem hle a; tun hnaia US Consul General thusawi hi kan zirlaite hian chonah ngai se, zirna sang zawk bei turin an rilru siam thei se a duhawm ngawt mai.