Chhiatna thleng thei laka fimkhur

Kumin March 31 aṭanga April 2 inkara ruahsur, thlipui tleh leh rial tla avangin Mizoram hmun hrang hrangah chenna in 2,311 a chhia. In chhia 2,311 zinga 335 chu luah zui tlak lohin a chhia a, in 1,976 chu thawm ṭhat theih a ni thung.

Tun hnaia ruahsur, rial tla leh thlipui tlehin chenna in a tihchhiat tuarte chhawmdawlna atan Mizoram sorkar chuan State Disaster Relief Fund (SDRF) aṭangin, chhiatna thlen aṭanga hun rei lo tê chhungin cheng nuai 450 a pe chhuak nghal thuai a; a lawmawm hle mai a, chhiatna tuartute'n an ṭangkaipui ngei a beiseiawm. Heng bakah hian, bawrhsapte'n chhawmdawlna tur sum an kawlsa aṭangin ṭanpuina an pe chhuak nghal thuai bawk a, a lawmawm hle a ni.

Mizorama sik leh sá hunbi thlen ṭhin dan ngaihtuahin, ṭo a haw ṭêpin a rinawm a, fûrin a zui thuai a rinawm. Ṭo haw leh a ken tel thil dang thawk thut ṭhin hian Mizoramah chhiatna a thlen fo. Kuminah chuan chhiatna dang a thlen lohna turin sorkar mai bakah, mipuite inbuatsaih ila a ṭha hle ang. Mi tinin invênna tura tih theih kan nei ngei ang.

Fûr a thleng leh ngei dawn; leimin, tuilian leh chhiatna dang dang thlen duh hun a ni. Chhiatna a thlen loh nan leh a tuartu kan nih loh nan mi tin, chhungkaw tinte fimkhur ila, inhmakhua lâwk ila; chu chu kan him tlânna tura thil pawimawh em em a ni.

Sorkar thuneitute lam pawhin ṭan an lâk lehzual a ngai a, mihring tana harsatna leh chhiatna thlen thei thil, hlauhthawnawm a awm leh awm lohte vil uluk lehzual thei se. Hmun ṭhenkhat, chhiatna thlen a hlauhthawnawm zualna laite phei chu enfiah fo thei se a ṭha hle ang.