Kawngpui zauh leh zangnadawmna

Kolasib District Land Owners' Association chuan Vairengte leh Sairang inkar kawng zauh tura harsatna awmte April 15, 2024 hmaa chinfel a nih loh chuan Lok Sabha inthlan boycott a, vote thlâk loh an tum thu an puang a; kawngpui zauhna atan an ram lak avanga zangnadawmna an dawn turah Forest department chu harsatna siamtuah an puh.

KDLOA hruaitute sawi danin, EFCC department-in kawng aṭanga metre 500 chin chu forest reserve-ah an puang a, mahse, chu chu Gauhati High Court-in a hnâwl. Court thutlukna hi khing lêttu awm mah se, a khingtu an inhnuhdawh avangin Court thutlukna chu a la ding reng tihna a ni a; Forest department-in kawng aṭanga metre 500 chin forest reserve-a a puanna chu thu tling lo tihna a ni. Cabinet meeting pawhin court thutlukna a pawm a, mahse, EFCC department-in an pawm duh lo niin an sawi.

High Court thutlukna leh Cabinet meeting thutlukna a awm chungin EFCC lam an la ṭang tlat niin a lang a, ṭan chhan ṭha tak dang an la nei pawh a ni mai thei. Chutih rualin, department neitu leh thawktute pawh ruaitu sorkar thu zawm duh lohna a ni thei a, court thu zah lohna leh zawm duh lohna a thei bawk.

Sorkar department-in sorkar thu a zâwm duh lo a, a bawhzui duh lo a nih chuan a ṭha lo a, sorkar tan a tlàwmthlak a, action lâkna chi a ni. Court thu zawm duh lohna thilah a kal a nih phei chuan a ṭha lo hle a, thil 'serious' tak a ni a, ngaihthah mai mai chi a ni lo ang.

Ram neitute'n an ram an chán tawh a nih chuan, ram phû tâwk ang zela zangnadawmna an hmuh hi an chanvo a ni a, lo thîk chi a ni lo. Ram neih dan leh a kaihhnawih thil hrang hrangah dik lo a awm a nih si loh chuan zangnadawmna an dawn thuai theihna tura hmalak chu mawhphurhtute tih tur a ni.