Chhiahah sorkar ṭang lehzual se

Mizoram sorkar tana sum la luttu pui ber Taxation department chuan financial year 2023-24 chhungin chhiah cheng vbc. 1,112.58 an hmu a; cheng vbc. 14.08-in target an khûm a, cheng vbc. 91.92-in kum 2022-23 chhunga an hmuh an khûm.

Taxation-in state sorkar target bituk an khûm thei leh kum hmasa lama chhiah hmuh zat cheng vbc. 91 chuanga an khûm thei hi a lawmawmin a ropui hle mai a; department-a thawktute zawng zawng inpekna leh thawhrimna a lawmawm. Mipui pawhin chhiah pek an ngai pawimawh tial tial bawk niin a hriat a, a lawmawm hle a ni.

Department hotute chuan, kum 2022-23 aia kum 2023-24 chhunga chhiah hmuh zat a pun chhan ber pakhat chu sumdawngte an nih thu an sawi. Mizorama sumdawngte zingah chhiah pe ṭha tak tak, a hun taka pe zat zat leh an pek tur ang zat ziah ṭhin tam tak an awm a, a lawmawm.

Chutih rualin, chhiah pek ngaihthah mi eng emaw zat an awm a, chhiah pek tur zat thup ṭhen a, pek tur aia tlem pe ṭhin an awm bawk tihte sawi a ni. Sumdawng, chhiah pe tur ni reng si, inziak lut lo a, chhiah âwl char charte pawh an la awm nual nia sawite pawh a awm.

Dan ang taka chhiah pe tur chuan chhiah pe ngei se, âwl rûk tum lo se, chhiah pek tur zatte pawh thup ṭhen loin, a zat chiah chiah pek zat zat ni ṭhin se. Kan state sum lak luh a pung ang a, suma Mizoram sorkar harsa lutuk a ziaawm phah ngeiin a rinawm.

Sorkar hotute leh Taxation department pawhin chhiah pe turte'n an pek vek theih nan ṭan la lehzual se. Chhiah âwl rû leh inthup ṭhen an awm leh awm lohte khauh lehzuala vil ni se; chutiang tur chuan thawktu indaih deuhte pawh a ngai ang, a ṭul angin sorkarin department pawh tichak zel a ṭul ang.

Chhiah tipung si loin, chhiah pe turte'n an pek vek theih nan sorkar hian ṭan la lehzual se, sum tam tak a lak luh belh thei ngeiin a rinawm.