Thu dik lo hmanga inbeih sim a ngai

MNF President chuan Lok Sabha inthlan atana inbuatsaihna kal mek chungchang April 10, 2024-a Mizo Hnam Rûna MNF hruaitute'n an sawihonaah, "Mimal, a chhe zawnga insawisak vak vak hi thil hrisel lo leh hnam ang pawha kan hmél tibâltu a nih theih avangin keini chuan chíng ve lo ila. Hetiang uar ṭhin pawlte ze chhe tak hi i chíng ve hauh lo ang u," tiin an mite a chah tih; MNF press release chuan a tarlang.

MNF President thusawi hi a lawmawm a, a takin bawhzuiin zâwm thei se a lawmawm lehzual ang. An party mite chêt dan leh mimal insawiselna lama an dinhmun chungchangah chuan ngaihdan a inang lo theiin a rinawm a; chutiang bawkin party dang mite pawh.

Mizoramah, a bikin inthlan dawn hnaiah mimal insawichhiatna te, a chhe zawnga inthlana candidate-te chanchin sawite a tam ṭhinzia kan hre tlangin a rinawm. Insawichhiatna ṭhenkhat chu thu dik lo hulhual leh phuahchawp te, thu dik tluantling lote a ni fo.

Party dangte leh an candidate-te tihhmingchhiat tuma sawichhia a, thu dik lo vawrh darh hi sim thei ila a ṭha hle mai. Hetiang thil hi hnam rinawm anga inchhâl ṭhin Mizo zia a ni lo; Pathian thu nen pawh a inmil lo a, Isua hnung zuitu Kristiante chêt dan tur a ni lo.

Politics a nih tâk avanga engkim thiang, thu dik lo sawi pawh pawi lo leh a thiang anga ngaihna hi mi tam tak chuan an nei tawh niin a lang a; politics kan kalpui ṭhin dan dik loin a nghawng chhuah a nih a rinawm.

Hma lam hun kal zel turah politics dik leh ṭha, kalphung dik kan neih theih nan political party-te'n ṭan la se, an party mite pawh thu dik chauh sawi turin kaihruai thei se a duhawm hle. Chutiang tur chuan hruaitu lú ber aṭanga bul ṭan a ngai ang. Thu dik lo hmanga inbeih ṭhin hi sim a ngai e.