Fimkhur lehzual a hun

Mizoram sorkar chuan Aizawl Municipal Corporation huam chhunga lockdown a puan chu tukin aṭangin a phelh ta a, hetihlai hian Covid-19 No Tolerance Drive puang zuiin mipuite Covid-19 laka an him theihna turin ruahmanna thar a siam.

Covid-19 avanga mipui tawrhna hi a nasa ta hle mai a, a retheiin an retheih zual phah a, mi hausa ṭhenkhatin an tlakchiat phah dâwn niin a lang a, sorkar meuh pawhin a harsat phah hle tih a takin kan hmu mêk. 

He hripui hian kan nunphung nasa takin a tibuai tawh a, kha leh chen kha hnathawk thei loa kan inkharkhip a, kan inkhung hran tawh hnuah pawh hripui avanga harsatna hi a ziaawm thei lo. Hei vang hian inkharkhip reng ai chuan nunphung pangngaia zawi zawia kir leh tura ruahmanna siam a, fimkhur zual tura inzirtir hi thil tihâwm tak a ni reng a ni. 

Sorkar hian ruahmanna siam mah se a taka tihlawhtling theitu chu mipuite kan ni a, sorkarin ruahmanna a neih ṭhat phawt chuan mipui nawlpui hi chuan thu an awih ṭhin tlangpui a, hei vang hian Covid-19 laka kan him theihna tur hian ruahmanna ṭha kan mamawh ta hle a ni. 

Hetiang hi kan dinhmun a nih avangin Covid-19 laka kan himna tur hian mipui leh sorkar thawhhona ṭha a awm a ngai tih lang a, sorkarin ruahmanna a siamte a hlawhtlinna turin mipuiin thuawih zir ila; tun hi fimkhur hun a ni mai lo a, a hma aia fimkhur zual hun a ni tih i hre reng ang u.