Kan mi duh tak i thlang ang u

India ram rorelna sanga Mizoram aiawh tur thlanna a hnai tial tial a, political party-te leh candidate-te pawh an ṭang hle a, tlin ngei tumin theihtawp an chhuah mek a ni.

Lok Sabha inthlan hi Mizo mipuiin Assembly inthlan ang em emin kan la vung lo a, kan ngai pawimawh tâwk lo deuh. Chuti chung chuan political party leh candidate-te tan chuan ṭan a na em em tho a, theihtawp an chhuah mek zel. MP neih ngei tuma political party-te leh candidate-te'n theihtawp an chhuahnaah hian thil mawi lo leh dik lo hmanga ṭan lâk te, thu dik tluantling lo leh dâwt hmanga mi beih leh thu thehdarhte ti lo vek thei se a duhawm hle.

Mizo mipuiin MP thlan kan ngaih pawimawh tâwk loh avangin vote pawh a tla ṭha tâwk lo ṭhin a; party-te leh candidate-te an ṭan viau laiin, mipui náwlpui erawh chuan an ngaihven teh chiam lo ni pawhin a lang. Mizoram People Forum lam pawhin tun ṭum MP thlan turah hian thâwm an nei ring lo rih viau.

Hun kal tawha MP inthlanah vote a tlâk ṭhat tâwk loh avangin Election lama thuneitute an ṭang hle a, an thusawi hrang hrangah pawh vote thlâk ngei turin Mizoram mipui an chah mawlh mawlh a, kawng hrang hrangin hma an la bawk.

Election thuneitute ṭhahnemngaihna hian rah ṭha chhuah thei se a duhawm hle a, rah ṭha chhuah tur chuan mipui an pawimawh ber. Mizoram mipui hian India ram pum rorelnaa kan state aiawh tur kan thlang dawn a, a pawimawh hle a ni tih hriain, kan mi duh tak thlang turin vote thlâk ṭheuh ila; Mizoramah vote tla a ṭhat chuan Mizoram leh Mizote hmingṭhatna tur a ni tih pawh hria ila. Vote thlâk ngei turin tun aṭang hian rilru i siam ang u.