Thu dik a lang chhuak ṭhin

All Mizoram Car Rental Association (AMCRA) chuan, Lok Sabha inthlanpui inbuatsaihna kal mekah election official ṭhenkhatte tana rental car hman hawh chungchanga resolution an lo siam tawh avangin Adviser to Chief Minister pakhat leh SCERT Deputy Director pakhat hnenah ngaihdam an dil.

AMCRA hian CM Adviser leh SCERT officer pakhat chu rental car hman chungchangah dik lo taka thil ti leh an tuhneihna hmang sualah an puh a; CM Adviser chu MLA aṭanga bàng tur leh SCERT officer chu a hna aṭanga bàn an phût a ni. Mahse, an thil tih leh phût an neih chhante chu thu dik lo an dawn vang nia sawiin, ngaihdam an dil leh ta zawk a; an dik lo a ni tih inpawma ngaihdam an dil hi an fakawm.

AMCRA hian an thutlukna siam hmasak hi politics-a mi beihna remchang an zawn vang a ni thei a, a ni lo thei bawk a. Lok Sabha inthlan a hnai tawh a, campaign vanglai a ni bawk nen, AMCRA hian politics-a mi va beih an tum vanga an tih a ni lo a nih pawhin, political party mi ṭhenkhat chuan an khingpuite beihna atan erawh an hmang zui ta tho a ni.

Political party leh an mi leh sate hi an inbei ṭhin a, inthlan dawn hnaiah an inbei nasa zual a. Mi tam tak phei chuan thu dik tluantling lote leh thu dik lote hmangin an khingpuite an bei fo tawh. Thu dik lo hmanga mi beih te, thu dik tluantling lo hmanga mipui rilru kaihhruai tumte hi a ṭha lo a, Kristian, Isua ringtute tih dan tur a ni lo.

AMCRA hmalakna chungchangah pawh, hun a kal a, thu dik chu a rawn lang chhuak ta niin a lang a, a lawmawm. Hei hi Mizo mipui, a bikin political party mite min kai harhtu ni thei se. Hun kal tawh thilahte leh hun lo la kal zel turah pawh thu dik lo hmanga inbeihnaah thu dik lang chhuak zel rawh se. Thu dik chu a tlo a, lan chhuah hun leh dinchan hun a nei nge nge ṭhin.