Remna Ni

Mizorama tlawmngai pawl (NGO) hrang hrang hruaitute inhmu khawm chuan, Central YMA kaihhruaina hnuaiah kumin June 30-ah Remna Ni a huhoa hman an rel. Remna Ni hi district-ah pawh YMA sub-headquarters YMA-te kaihhruainaa hman ṭha an ti a; Lawngtlaiah chuan Central YLA leh Saihaah MTP-te huaihawt tura ngen an rel.

India sorkar leh MNF-in inremna an ziah ni, Remna Ni hi hun rei tak chhung chu political party-te pual ang deuha ngaih a ni a, inhnialna tam tak a chhuak ṭhin. Remna Ni hman dan chungchang hi YMA General Conference vawi 70-na, Bairabi-a neihah, 'Mipui náwlpuiin a huhoa lungrual taka hman a nih theih nan sorkarah thlen ni rawh se' tiin an rel a; NGO-te leh political party aiawhte kal khawm chuan Remna Ni chu YMA kaihhruaina hnuaia hman an lo rel tawh a ni.

Zofate tan ni chhinchhiahtlak ber pakhat ni si hi inremna ni angin kan hmang hleithei lo a, political party lamin san zawk leh tiṭha zawk nih inchuhna ni ang maiin an hmang a, a pawi hle. A huhoa he ni hman dan tur rel a ni ta hi a lawmawm a, hei hian nakin zelah rah ṭha zawk chhuah ngei se a ṭha ang.

Hetihlai hian Remna Ni a huhoa hman han tih hian a hman dan azirin inrem lohna a chawk chhuak palh ang tih a hlauhawm a, platform thuhmuna political party hrang hrang thusawitir emaw, hun pek an nih chuan a huai-hawttute beisei loh zawngin a thawk ve palh thei. Heng zawng zawng hre chung hian Remna Ni hman dan tur pawh hi duang se, fimkhur leh uluk taka kalpui chi a ni ang.

Remna Ni hi Mizote tana ni pawimawh, ni hlimawm leh ni chhinchhiahtlak a ni a, hei vang hian a huhoa hlim taka hman ngei chi a ni a, he ni hian Mizote zingah remna thlen nawntir thei se a duhawm hle.