Kuthnathawktute leh sum

MNF president Zoramthanga chuan MNF-in sorkarna an siam thei a nih chuan kuthnathawktute chu suma ṭanpui an tum thu tun hnaiah a sawi a, Rs 3,00,000 aia tlem lo
ṭanpuina an pek tur thu a sawi.

Congress kaihhruai sorkar kan nei mek a, anni hian NLUP an kalpui a, sawi a hlawh khawp mai. NLUP hnuaiah hian kuthnathawktute ṭan-puina sum leh pai pek chhuah a ni a, sum ṭhahnem tak sem chhuah a ni tawh. NLUP hi mi tam tak chuan Congress tlin chhanah an puh a, an intiam ang ngeiin sorkarna an chan hnuah NLUP kal tlangin sum an sem zui ta bawk a ni.

Khawvelah sorkar tam tak a ding mek a, India ram chhungah pawh state leh UT ṭhahnem tak a awm a, heng zingah hian a thlawna sum sem policy-a kalpui hi an tam lo hle ang. Pawisa sem kher lo hian kuthnathawktute khai chhuah dan policy ṭha tak tak an duang chhuak thei a, tun hmaa ram/state rethei ni ve ṭhinte pawh policy ṭha tak nen an ding chhuak mek a ni.

Tuna political party pakhatin sum an sem hian ṭhatna nei bawk mah se mipui rilru a tipiangsual ṭan mek a, hnathawk hah loa a thlawna sum lakluh duhna mipuiin an nei a, a pawi khawp mai. Hetihlaia political party dangin, "Sum sem hi kan titawp ang," tih rilru pu loa, "Min thlan tlin chuan a aia tam kan sem ang," tia mipui an tlawn leh ta hi a pawi takzet a, hei hian Mizoram mipuite rilru hi a tipiangsual hlen ang tih hlauhawm tak a ni.

Mi taima leh thawkrim, ṭanpui ngaite leh ṭanpui phûte chu an awm ngei a, heng mite hi chu an mamawh huna sum leh paia ṭanpui pawh an ṭha mai thei a; nimahsela mipui nawlpui hnena a thlawna sum peka ram siam ṭhat tum hi chu a hlawhtling thui lo ang tih a hlauhawm khawp mai.

NLUP sem a ni a, chumiin kan ram a siam ṭhat leh siam
ṭhat loh chu a taka hmutu kan ni a, chutihlaia sum sem lam bawk policy-a neih tum an pun belh zel hi a pawi a, sum sem hmanga ram siam ta sawi tur hi an vang hle a ni.